Sonali Phogat Case: भाजप नेत्या आणि टिकटॉक स्टार सोनाली फोगट यांच्या कथित हत्या प्रकरणाची पुढील सुनावणी आता 30 डिसेंबरला होणार आहे. म्हापसा जीएमएफसी (Mapusa JMFC) कोर्टाने हे हत्या प्रकरण आता जिल्हा सत्र न्यायालयाकडे वर्ग करण्यात आले आहे. सोनाली फोगट यांचा 23 ऑगस्ट रोजी गोव्यात संशयास्पद मृत्यू झाला होता.

सीबीआयने फोगट हत्या प्रकरणाच्या आरोपपत्रासोबत इतर काही कागदपत्रे (सीसीटीव्ही फुटेज दस्ताऐवज) जोडली आहेत. ही कागदपत्रे आम्हास उपलब्ध करावीत, असा अर्ज संशयितांच्या वकिलांनी वरील जीएमएफसीसमोर केला होता. हा अर्ज संबंधितांकडून शुक्रवारी मागे घेण्यात आला. शुक्रवारी (ता.16) सकाळच्या सत्रात जीएमएफसी कोर्टात हे प्रकरण सुनावणी आले, यावेळी सीबीआयने नियुक्त केलेले विशेष सरकारी वकील हजर होते. त्याचप्रमाणे संशयित सुधीर सांगवान व संशयित सुखविंदर पाल सिंग यांना कोलवाळ मध्यवर्ती कारागृहातून आज न्यायालयात उपस्थित करण्यात आले होते.

मागील 05 डिसेंबरच्या सुनावणीवेळी दोघेही संशयित अनुपस्थित होते.दरम्यान, सोनाली फोगट हत्याप्रकरणी त्यांचा स्वीय सहाय्यक सुधीर सांगवान आणि सहकारी सुखविंदर पाल सिंग यांना 25 ऑगस्टला गोवा पोलिसांनी अटक केली होती. सध्या हे दोघेही संशयित कोलवाळ कारागृहात न्यायालयीन कोठडीत आहेत. गोवा पोलिसांकडून याप्रकरणाचा तपास हा सध्या केंद्रीय अन्वेषण विभागाद्वारे (सीबीआय) केला जात आहे. सीबीआयने सोनाली फोगट हत्याप्रकरणी न्यायालयात 2,500 पेक्षा जास्त पानी आरोपपत्र दाखल केले असून, यामध्ये 104 साक्षीदार आहेत.