म्हापसा: एटीएम कार्ड चोरून त्याआधारे संबंधिताच्या बँक खात्यातून पैसे काढणाऱ्या दोघा संशयितांना म्हापसा पोलिसांनी अटक केली असून त्यांना आठ दिवसांची पोलिस कोठडी सुनावण्यात आली आहे. अटक केलेल्या संशयितांमध्ये सोनू कुमार (३२) व संजय महेस्वल (३३) या हरियाणामधील चोरट्यांचा सहभाग आहे.

पोलिसांच्या माहितीनुसार, चोरीचा हा प्रकार २६ जून रोजी घडला होता. संशयितांनी म्हापसा मार्केट परिसरातील एका एटीएम काउंटरमध्ये तिघा पीडितांचे पैसे चोरले होते. या संशयितांनी पीडितांचे एटीएम कार्ड हातचलाखीने बदलले.

नंतर पीडितांच्या कार्डच्या आधारे संबंधितांच्या बँक खात्यातून अनेकवेळा पैसे चोरले. तिघा पीडितांचे मिळून १,४१,५०० रुपयांवर चोरांनी डल्ला मारला होता. फसवणूक केलेले बार्देशमधील असून त्यात एका महिलेचा समावेश आहे.

दरम्यान, या चोरांना अलीकडेच डिचोली पोलिसांनी अशाच गुन्ह्यात अटक केली होती. त्यानुसार म्हापसा पोलिसांनी आपल्या हद्दीतील वरील चोरीप्रकरणी या संशयितांना ट्रान्झिट रिमांडवर ताब्यात घेत रितसर अटक केली.