Illegal Cutting Trees : गोवा वन खात्याने ‘स्टे ऑर्डर’ बजावलेली असतानाही शनिवारी (ता. २२) संधी साधून वेलिंग-प्रियोळ-कुंकळये ग्रामपंचायत क्षेत्रातील मंगेशी-कुंकळये जंक्शनजवळील बेकायदेशीरपणे झाडांची कत्तल करण्यात येत होती. गावातील लोकांना याची माहिती मिळताच घटनास्थळी धाव घेऊन त्यांनी बेकायदा वृक्षतोड रोखली.

जेसीबी तसेच लाकूड कापण्याच्या यंत्राच्या साहाय्याने गुपचूपपणे वृक्षतोड सुरू होती. जागरूक नागरिकांनी वेळीच दखल घेत ही वृक्षतोड रोखली.

यावेळी शिवदास नाईक यांनी झाडे कापण्यास मनाई असल्याची ऑर्डर दाखविली. सुरेश नाईक, वेद रानडे, विकी जल्मी, गौरेश गावडे, रूपो जल्मी, रोहित जल्मी, स्वप्निल भंडारी आणि सरगम गावडे यावेळी उपस्थित होते.

लोकप्रतिनिधींकडून असहकार्य

गौरेश गावडे यांनी स्थानिक आमदार गोविंद गावडे यांच्यावर टीका करताना म्हटले, की आज जनतेने निवडून आणलेले लोकप्रतिनिधी हे लोकांबरोबर राहून गाव वाचविण्याचा प्रयत्न करत नाहीत.

वेलिंग-प्रियोळ-कुंकळये ग्रामपंचायत सरपंच तसेच इतर लोकप्रतिनिधींकडूनही स्थानिकांना सहकार्य मिळत नाही. पंचायत क्षेत्रात अनेक बेकायदा कामे घडत असूनही यावर कारवाई होत नाही.