Mangaluru-Goa Vande Bharat Express: मंगळुरू आणि गोवा दरम्यान वंदे भारत एक्सप्रेस ऑक्टोबरच्या अखेरीस सुरू करण्याचे आश्वासन, रेल्वे मंत्री अश्विनी वैष्णव यांनी दक्षिण कन्नडचे खासदार नलिन कुमार कटील यांना दिले.

कटील यांनी नवी दिल्लीत वैष्णव यांची भेट घेतली. कर्नाटकच्या किनारपट्टीवर वंदे भारत एक्स्प्रेस धावत नसल्याचे त्यांनी वैष्णव यांच्या निदर्शनास आणून दिले.

'मंगळुरु आणि गोवा दरम्यानच्या किनारपट्टीचा भाग देशाच्या दक्षिणेकडील महत्त्वपूर्ण आहे. हा प्रदेश निसर्गसौंदर्य, समृद्ध वारसा आणि वैशिष्ट्यपूर्ण सांस्कृतिक परंपरांसाठी ओळखला जातो. वंदे भारत एक्स्प्रेस सुरू झाल्यानंतर या भागात कनेक्टिव्हिटी वाढेल आणि आर्थिक आणि पर्यटनाला चालना मिळेल.'

'रेल्वेसेवा सुरु झाल्यानंतर मार्गावरील वाहतूक कोंडी कमी होईल. रेल्वे जाळे निर्माण करण्याची सरकारची संकल्पना देखील यामुळे साकार होईल, आणि त्याचा आर्थिक फायदा होईल,' असे खासदार काटील यांनी म्हटले आहे.

मंगळुरू रेल्वे क्षेत्राचा दक्षिण पश्चिम रेल्वेच्या म्हैसूर रेल्वे विभागाच्या प्रशासकीय आणि प्रादेशिक अधिकारक्षेत्रात समावेश करण्याची विनंती खासदार कटील यांनी वैष्णवांना केली. मंगळुरू रेल्वे क्षेत्राला दक्षिण रेल्वेने सावत्र वागणूक दिल्याने त्याचा पुरेसा विकास झालेला नाही. असेही कटील म्हणाले.