Morjim, Mandrem

मांद्रे मतदारसंघातून एक वेगळाच प्रकार उघडकीस आला आहे. घरात वीज नाही म्हणून रात्री एकच्या सुमारास मोरजी येथील एका व्यक्तीने थेट आमदार जीत आरोलकरांना फोन केला.

व्यक्तीने घरी वीज नसल्याची समस्या सांगितली असता संतापलेल्या आमदार जीत आरोलकर यांनी थेट या व्यक्तीविरोधात पोलिसांत तक्रार दाखल केली. शनिवारी (दि.११ मे) हा प्रकार घडला.

मोरजीच्या सरपंचासह इतर अनेकजण यावेळी आयलिन यांच्या समर्थनात हजर होते.

मोरजीचे सरपंच उमेश गडेकर यांनी दिलेल्या माहितीनुसार, घरात वीज नाही म्हणून आयलिन यांनी मांद्रेचे आमदार जीत आरोलकर यांना रात्री एकच्या सुमारास फोन केला. आरोलकर लोकप्रतिनिधी असल्याने सामान्य नागरिकांना त्यांना फोन करण्याचा अधिकार आहे.

पण, फोन केल्याने काही गैरसमजातून आरोलकर यांनी पोलिसांत तक्रार दाखल केली. पोलिसांनी फोन केलेल्या आयलिन यांना चौकशीसाठी बोलावले.

गेल्या चार दिवसांपासून आयलिन चौकशीसाठी पोलिस स्थानकात हजेरी लावत आहेत. या चार दिवसात झालेल्या विविध महोत्सवांना त्यांना हजेरी लावता आली नाही, तसेच, पोलिसांनी बोलावणी धाडल्याने आयलिन घाबरल्याचे गडेकर म्हणाले.

यासर्व प्रकाराबाबत मोरजीच्या ग्रामस्थांनी नाराजी व्यक्त केली असून, लोक प्रतिनिधींनी अशाप्रकारे वागणे चुकीचे असल्याचे मत स्थानिकांनी नोंदवले.

लोकप्रतिनिधी लोकांच्या समस्या सोडविण्यासाठी असतात, कोणी समस्या उपस्थित केल्यावर तक्रार करणे योग्य नाही. आयलिन यांनी फोन संभाषणात देखील काही चुकीचे शब्द वापरले नाहीत, असा दावा सरपंच गडेकर यांनी केला.

तसेच, आमदार आरोलकर यांनी देखील हा विषय समाप्त करावा, आम्हालाही तो वाढविण्याची इच्छा नाही, असे आवाहन देखील गडेकर यांनी यावेळी केले.