मांद्रे : सावंतवाडा परिसरात मालमत्तेच्या जुन्या वादातून एका ६५ वर्षीय ज्येष्ठ नागरिकासह त्यांच्या पत्नी आणि मुलावर सहा जणांच्या टोळक्याने निर्घृण हल्ला केल्याची धक्कादायक घटना घडली आहे. या हल्ल्यामुळे परिसरात तणावाचे वातावरण निर्माण झाले असून मांद्रे पोलिसांनी याप्रकरणी गुन्हा दाखल केला आहे. जमिनीचा हा जुना वाद आता हिंसक वळणावर पोहोचल्याने स्थानिकांमध्ये चिंतेचे वातावरण आहे.

रस्त्यात अडवून केला जीवघेणा हल्ला

तक्रारदाराने दिलेल्या माहितीनुसार, ते आपल्या कुटुंबासह जात असताना संशयित सहा जणांच्या टोळक्याने त्यांना रस्त्यात अडवले. सुरुवातीला शाब्दिक बाचाबाची झाली, मात्र त्याचे रूपांतर लवकरच हाणामारीत झाले.

या सहा जणांच्या टोळक्याने ज्येष्ठ नागरिक, त्यांची पत्नी आणि मुलाला लाथाबुक्क्यांनी बेदम मारहाण केली. हल्ला सुरू असताना पीडित व्यक्तीकडील मोबाईलही आरोपींनी हिसकावून घेतला.

मांद्रे पोलिसांनी पीडित ज्येष्ठ नागरिकाच्या तक्रारीवरून सहा संशयितांविरुद्ध विविध कलमान्वये गुन्हा नोंदवला आहे. सावंतवाडा भागातील हा मालमत्तेचा वाद अनेक वर्षांपासून प्रलंबित असल्याचे समजते.

पोलीस आता या प्रकरणातील सहाही संशयितांचा शोध घेत असून, परिसरातील सीसीटीव्ही फुटेज आणि प्रत्यक्षदर्शींच्या साक्षी तपासल्या जात आहेत.