Goa Loksabha Election 2024: गोव्यातील दोन लोकसभा जागांसाठी अनेक उमेदवार इच्छुक आहेत. विविध राजकीय पक्षाचे माजी आमदार, नेते उमेदवारीसाठी इच्छा व्यक्त करत आहेत.

भाजपचा बालेकिल्ला असलेल्या उत्तर गोव्यासाठी आता मांद्रेचे माजी आमदार दयानंद सोपटे इच्छुक असल्याचे त्यांनी जाहीरपणे सांगितले आहे. शिवाय श्रीपाद भाऊंनी आता विश्रांती घ्यावी असा सल्लाही सोपटे यांनी दिला आहे.

काय म्हणाले दयानंद सोपटे?

पक्षाने मला संधी दिल्यास मी उत्तर गोवा लोकसभा निवडणूक लढण्यास तयार आहे. मला उत्तर गोवा मतदारसंघ नवा नाही. श्रीपाद भाऊनी गेली 40 वर्षे पक्ष, गोव्यासह देशाची सेवा केलेली आहे. आता सगळ्यांनाच वाटतं की श्रीपाद भाऊंना आता विश्रांतीची गरज आहे.

श्रीपाद भाऊनी नव्या दमाच्या नेत्यांना संधी देण्याची गरज आहे, असे मांद्रेचे माजी आमदार दयानंद सोपटे म्हणाले.

उत्तर गोव्यातील जागेसाठी अद्याप कोणत्याच पक्षाकडून ठोस हालचाल होताना दिसत नाही. भाजपकडून नीलेश काब्राल यांच्या नावाची चर्चा होते तर कधी लक्ष्मिकांत पार्सेकर यांचे नाव समोर येते. श्रीपाद नाईक यांच्या नावाबाबत सर्वत्र साशंकता व्यक्त केली जात असल्याने उत्तर गोव्यात भाजपचा नवा चेहरा कोण असणार याबाबत सध्या उत्सुकता आहे.

दरम्यान, गोव्यात मनोज परब यांच्या आरजी पक्षाने देखील लोकसभा निवडणूक लढविणार असल्याचे स्पष्ट केले आहे, त्यामुळे यावेळी राज्यात लोकसभेसाठी वेगळी चुरस पाहायला मिळणार आहे.