Goa Crime News : गोव्यात महिलांच्या बाबतीत घडणाऱ्या चुकीच्या घटनांमध्ये वाढच होताना दिसत आहे. गोव्यात महिलांशी कोणते तरी कारण काढून बोलण्याचा प्रयत्न करून त्यांच्यासमोर अश्लील हावभाव करण्याच्या आणि त्यांच्यासमोर जाणीवपूर्वक आपले खाजगी अवयव दाखवण्याच्या घटना मागील काही दिवसांपासून घडत आहेत. यासंदर्भात आगशी पोलिसांनी कोलवाळ मधील एकाला अटक केली आहे.

मिळालेल्या माहितीनुसार, हा सर्व प्रकार गोवा विद्यापीठाच्या परिसरात घडला. विद्यापीठात शिकणाऱ्या मुली रस्त्याने चालत असल्या की एकजण त्यांच्याजवळ येऊन दिशा विचारण्याच्या बहाण्याने किंवा कोणतीही मदत मागण्याच्या बहाण्याने त्या मुलींजवळ येत असे आणि त्यानंतर मुली त्याच्या प्रश्नाचे उत्तर देत असताना तो त्याची पॅंट खाली करून त्या विद्यार्थिनींसमोर अश्लील हावभाव करत आपले खाजगी अवयव त्यांना दाखवत असे.

अशा अनेक घटना या काही दिवसांमध्ये घडल्या. पोलीस विभागातर्फे विद्यापीठात आयोजित करण्यात आलेल्या 'महिला सुरक्षा' कार्यक्रमादरम्यान विद्यार्थिनींना मार्गदर्शन करताना पोलिसांच्या ही गोष्ट लक्षात आली.

या संपूर्ण प्रकरणाबाबत विद्यार्थिनींनी पुढे येत त्या माणसाबाबत पोलिसांना सर्व प्रकार सांगून तक्रार दाखल केली. यानंतर पोलिसांनी सापळा रचत कोलवाळमध्ये राहत असलेल्या 39 वर्षीय विराज चारी याला ताब्यात घेतले आहे.