बार्देश: फोनवर बोलताना पाय घसरुन टेरेसवरुन खाली पडल्याने ३४ वर्षीय तरुणाचा मृत्यू झाला आहे. काणका - बार्देश येथे मंगळवारी (२९ एप्रिल) रात्री साडे आठच्या सुमारास ही घटना घडली. तरुणाला उपचारासाठी गोवा वैद्यकीय महाविद्यालयाच्या रुग्णलयात दाखल करण्यात आले पण, तोपर्यंत फार उशीर झाला होता.

कमलेश कुमार (वय ३४, रा. काणका, बार्देश, मूळ गाझीपूर- उत्तरप्रदेश) असे या घटनेत मृत्यू झालेल्या तरुणाचे नाव आहे.

मिळालेल्या माहितीनुसार, कमलेश काणका येथील घरी मंगळवारी रात्री फोन बोलत होता. बोलत असताना त्याचा टेरेसवरुन पाय घसरला आणि तो खाली पडला. कमलेशला गंभीर दुखापत झाली होती. स्थानिकांना तातडीने त्याला रुग्णालयात दाखल केले.

कमलेशला उपाचारासाठी बांबोळी येथील गोवा वैद्यकीय महाविद्यालयाच्या रुग्णालयात दाखल करण्यात आले. दरम्यान, उपचार सुरु असताना कमलेशचा मृत्यू झाला आहे. पोलिसांनी घटनेचा पंचनामा केला. या घटनेत कोणत्याही प्रकरणात कोणत्याही प्रकारचा गैरप्रकार असल्याची शक्यता नाकारली आहे.