पणजी: राज्यात विधानसभा निवडणुकीची (Goa Assembly Election) धामधूम सुरू झाल्याने राज्याबाहेरीलही अनेक राजकीय पक्ष सक्रिय झाले आहेत. यात तृणमूल कॉंग्रेस (TMC) आघाडीवर असून पश्चिम बंगालच्या मुख्यमंत्री आणि तृणमूलच्या सर्वेसर्वा ममता बॅनर्जी (Mamata Banerjee) गुरुवारी संध्याकाळी गोव्यात येत आहेत. उद्या, 29 ऑक्टोबर रोजी त्यांचे राज्यात ठिकठिकाणी कार्यक्रम होणार आहेत.

बॅनर्जी दोन दिवसांच्या गोवा भेटीत विविध ठिकाणांना भेटी देणार आहेत. तृणमूल कॉंग्रेस कार्यालयाकडून मिळालेल्या माहितीनुसार, सकाळी त्या पक्षाच्या स्थानिक नेत्यांशी बैठक घेऊन निवडणुकीची रणनीती आखणार आहेत. नंतर त्या गोमंतकीय नेते, कार्यकर्ते, सामाजिक कार्यकर्ते, नागरिक यांच्याशी चर्चा करतील. शिवाय ऐतिहासिक महत्त्व असलेली मंदिरे आणि चर्चलाही भेट देण्याची शक्यता आहे. आज तृणमूल काँग्रेसच्या कार्यालयात झालेल्या पत्रकार परिषदेत खासदार डेरेक ओ ब्रायन यांनी ममता बॅनर्जी यांच्या दौऱ्यासंदर्भात माहिती दिली. सत्यपाल मलिक यांनी केलेले आरोप खूपच गंभीर आहेत. राज्यात सत्ताधारी भाजपविरुद्ध सुरू असलेल्या आंदोलनाचाही त्यांनी उल्लेख केला. यावेळी यतीश नायक, स्वाती केरकर आदी उपस्थित होते.