Malim Jetty Fish Rates

पणजी: गोवा सरकारद्वारे नागरिकांना स्वस्त दरात मासळी मिळावी, यासाठी मासेमारीसाठी टॉलर्सधारकांना डिजेलवर अनुदान दिले जाते. गोव्याच्या मच्छीमारांना काही प्रमाणात सवलत मिळावी, यासाठी प्रयत्न केले जातात. परंतु सर्वसामान्य नागरिकांना स्वस्त मासे काही मिळत नाहीत. तेथे मासे महाग असतात.

अनेक नागरिक मालीम जेटीवर बाजारापेक्षा स्वस्त आणि ताजी मासळी मिळेल, या आशेने खरेदीसाठी जातात. परंतु तेथे जाणे म्हणजे चार आण्याची कोंबडी आणि बारा आण्याचा मसाला अशी अवस्था होते.

मालीम जेटीवर येणारे मासे हे गोव्यातील समुद्रातील कमी असतात आणि आंध्रप्रदेश आणि कर्नाटकातून आलेली मासे अधिक असतात. गोवेकरांना स्थानिक मासळी शक्यतो मिळत नाही. ही मासळी मोठ्या प्रमाणात निर्यात केली जाते. त्यामुळे मालीम जेटीवर खरेदीसाठी गेलेल्या मत्स्यप्रेमी खवय्यांची मोठ्या प्रमाणात निराशा होते.

पणजी बाजारात जर इसवण ५०० रूपये किलो असेल मालीम जेटीवर इसवणाचा दर ५५० रुपये असतो. इतर मासळीचे दरही बाजारापेक्षा चढेच असतात. मालीम जेटीवर मासळी विकणारी नेमके स्थानिक विक्रेते की इतर कोणी याबाबतही साशंकता निर्माण होते. त्यामुळे या प्रकाराकडे मत्स्य व्यवहार संचालनालयाने योग्य ती दखल घेत कारवाई करण्याच्या मागणीत वाढ होत आहे.