वास्को: मनोहर पर्रीकर यांचे सोनेरी गोव्याचे स्वप्न पूर्ण करण्याची जबाबदारी भाजपच्या प्रत्येक नेत्यांबरोबर कार्यकर्त्यांची देखील आहे. गोव्याचा समुद्र म्हणजे येथील जनतेचा देव तर देशाचे भाग्य म्हणजे पंतप्रधान नरेंद्र मोदी. गोव्याच्या (Goa) विकासाला पुढे नेण्यासाठी येणाऱ्या विधानसभा निवडणुकीत भाजपला स्पष्ट बहुमत द्यावे, असे मध्यप्रदेशाचे मुख्यमंत्री शिवराज सिंह चौहान यांनी वास्को येथे सांगितले. (Goa Election 2022 News)

दाबोळी मतदारसंघातील नवेवाडे येथील श्री राष्ट्रोळी जय संतोषी माता सभागृहात आयोजित भाजपच्या (BJP) जाहीर सभेत चौहान बोलत होते. व्यासपीठावर त्यांच्यासोबत माविन गुदिन्हो, दाबोळी भाजप प्रभारी जयंत जाधव, नगरसेवक विनोद किनळेकर, दाबोळी भाजप गटाध्यक्ष संदीप सूद, दक्षिण गोवा भाजप अध्यक्ष तुळशीदास नाईक, चंद्रकांत गवस, वामन चोडणकर, दिगंबर आमोणकर व इतर पदाधिकारी, कार्यकर्ते उपस्थित होते.

ते पुढे म्हणाले, काँग्रेस पक्ष बुडणारे जहाज असून त्यांची सत्ता आता संपली आहे. काँग्रेस (Congress) पक्षाने गोव्याला विकासापासून वंचित ठेवले होते. पंतप्रधान मोदी, केंद्रीय रस्ता अवजड मंत्री गडकरी यांनी गोव्याला नवी दिशा देऊन देशात विकासशील राज्य केले. मुख्यमंत्री डॉ. सावंत यांनी येथील प्रत्येकाला कोविड प्रतिबंधक लस उपलब्ध केली.

भाजप लोकशाहीचा सन्मान करणारा पक्ष असून गोव्यात भाजपला स्पष्ट बहुमत प्राप्त करणार आहे. दाबोळी विकासात येथील जनतेचे महत्त्वाचे स्थान असून येणाऱ्या काळात दाबोळीचा आणखीन विकास साधणार असल्याची माहिती गुदिन्हो यांनी दिली.