मडगाव: माजोर्डा धीरयो प्रकरणी कुडतरीचे माजी पंच सदस्य रुई मिनेझिस याचा ठावठिकाणा पोलिसांना अजूनही लागू शकला नाही. त्याने मोबाईलही बंद करून ठेवला आहे. पोलिसांनी त्याच्या घरावर आता पाळत ठेवली आहे.

तो घटनेच्या दिवसांपासून घरी फिरकलेला नाही. घरची मंडळीही पोलिसांना दाद देत नाहीत. त्यामुळे पोलिस हतबल झाले आहेत. या प्रकरणी राकेश यादव व मीनिन डिसोझा हे अन्य दोघे फरार असून पोलिस त्यांच्या शोधात आहेत. या तिघांनीही अटकपूर्व जामिनासाठी न्यायालयात धाव घेतली आहे.

दक्षिण गोवा सत्र न्यायालयात उद्या (ता. ३०) या अर्जांवर सुनावणी होणार आहे. गेल्या सोमवारी माजोर्डा येथील धीरयोत उधळलेल्या एका रेड्याने राजेश निस्तानी याला शिंग भोसकल्याने तो ठार झाला होता. कोलवा पोलिसांनी मागाहून या प्रकरणी सांतान कार्दोज, जॉकिम पेरेरा व जुझे कुलासो या तिघांना अटक केली होती.

माजोर्डा येथील एका निर्जन शेतात (Farm) बैलांची झुंज होणार असल्याचे सूत्रांकडून सांगण्यात आले होते. यासाठीच बैलाला येथे आणण्यात आले होते. त्याचवेळी धक्कादायक घटना घडली. बैलांच्या झुंजीचा खेळ गोव्याच्या काही भागात पारंपारिक मानला जातो, पण तो पूर्णपणे बेकायदेशीर आहे. बैलाच्या हल्ल्यात राजेश निस्तानी यांचा जागीच मृत्यू झाला होता.