Panaji Smart City Traffic Issue: राजधानी पणजीत मागील अनेक दिवसांपासून स्मार्ट सिटीची कामे सुरू आहेत. शहरात अनेक ठिकाणी खोदकाम करण्यात आले आहेत, त्यामुळे वाहतुकीसाठी अडढळा निर्माण होत आहे.

दरम्यान, जवळ येत असलेला पावसाळा आणि G20 शिखर परिषदेच्या पार्श्वभूमीवर शहरातील स्मार्ट सिटीच्या कामांना वेग आला आहे. सध्या सांतीनेज परिसरात विविध कामे सुरू असल्याने या मार्गावरील वाहतुकीत महत्वाचा बदल करण्यात आला आहे.

उत्तर गोवा जिल्हाधिकारी मामु हागे यांनी याबाबत आदेश जारी केला आहे. या आदेशानुसार ताज विवान्ता जंक्शन पासून काकुलो मॉल या मार्गावर एकेरी वाहतूक असणार आहे.

या मार्गावर सध्या भूमीगत पाईपलाईन टाकण्यासह विविध केबलिंगचे काम सुरू आहे. त्यासाठी मार्गावर अनेक ठिकाणी खोदकाम करण्यात आले आहे.

एकेरी वाहतुकीचा आदेश मे महिन्याच्या 15 तारखेपर्यंत राहणार आहे. या मार्गावर प्रवास करणाऱ्यांनी या बदलाची नोंद घ्यावी अशी सूचना करण्यात आली आहे.

वाहतूक कोंडी होणार?

ताज विवान्ता जंक्शन ते काकुलो मॉल हा सांतीनेज परिसरातील एक प्रमुख आणि वाहनांची अधिक वर्दळ असणारा मार्ग आहे. दरम्यान, मार्गावर एकेरी वाहतूक केल्यानंतर मिरामार रस्त्यावर वाहतूक कोंडी होण्याची शक्यता आहे.

तसेच, पुढे अटल सेतुमुळे देखील वाहतूक कोंडीत वाढ होण्याची शक्यता आहे. त्यामुळे नागरिकांना वाहतूक कोंडी लक्षात घेऊन प्रवासाचे नियोजन करावे लागणार आहे.