MLA Disqualification Petition: आमदार अपात्रता प्रकरणी गोवा काँग्रेसचे अध्यक्ष अमित पाटकर यांनी दाखल केलेली याचिका विधानसभा अध्यक्ष रमेश तवडकर यांनी मान्य केली आहे. आमदार दिगंबर कामत आणि मायकल लोबो (Michael Lobo and Digambar Kamat) यांनी ही याचिका फेटाळण्याची मागणी केली होती. मात्र, कामत आणि लोबो यांची मागणी सभापतींनी फेटाळली असून, हा दोघांसाठी मोठा झटका मानला जात आहे.

गोवा काँग्रेसचे अध्यक्ष अमित पाटकर (Amit Patkar) सभागृहाचे सदस्य किंवा आमदार नसल्यामुळे ते अपात्रता याचिका दाखल करू शकत नाहीत. असा दावा करत आमदार दिगंबर कामत आणि मायकल लोबो यांनी याचिका नामंजूर करण्याची मागणी केली होती.

दरम्यान, पाटकर यांनी सभापती विरुद्ध उत्कल केशरी परिदा या सर्वोच्च न्यायालयाच्या निर्णयाचा दाखला देत, कोणतीही इच्छुक व्यक्ती अपात्रता याचिका दाखल करू शकते असा युक्तिवाद केला.

भारतीय राज्यघटनेच्या दहाव्या अनुसूचीनुसार कोणत्याही इच्छुक व्यक्तीला अपात्रता याचिका दाखल करण्याचा अधिकार आहे त्यानुसार, दोन आमदारांनी दाखल केलेला अर्ज फेटाळण्यात आला आहे. असे सभापतींच्या निर्णयात म्हटले आहे.

याप्रकरणाचा आता गुणवत्तेच्या आधारावर निर्णय घेण्यात येईल, असे सभापती तवडकरांनी नमूद केले आहे.