हरवळे: राज्यात सगळीकडे महाशिवरात्रीचा उत्साह आहे. २६ फेब्रुवारी बुधवारी मुख्यमंत्री डॉ. प्रमोद सावंत यांनी तांबडी सुर्ला येथील प्राचीन शिवमंदिरात प्रार्थना केली. गोव्यात विविध भागांमध्ये शिवरात्रीचा उत्सव साजरा केला जातो, यांपैकी हरवळे येथील रुद्रेश्वर देवस्थान प्रसिद्ध आहे. महाशिवरात्रीच्या निमित्ताने अनेक भाविक या मंदिराला भेट देतात. हरवळे,साखळी येथील श्री रूद्रेश्वर देवस्थानात प्रसिध्द असलेल्या महाशिवरात्री उत्सवाची तयारी जोरदारपणे सुरू आहे. दरवर्षी इथे दर्शनासाठी भाविकांची बरीच गर्दी पाहायला मिळते आणि यंदा लोकांची गैरसोय होऊ नये यासाठी देवस्थान समिती, उपजिल्हाधिकारी, पोलीस यंत्रणा यांनी उत्सवाचे नियोजन केले आहे.

रुद्रेश्वर मंदिर भक्तांनी सजले

हरवळे, साखळी येथील श्री रुद्रेश्वर देवस्थानाचे अध्यक्ष यशवंत माडकर यांनी गोमंतक टीव्हीला दिलेल्या माहितीनुसार मंगळवारपासून देवस्थानात उत्सवाची तयारी सुरु झाली आहे. भजन आणि कीर्तनानंतर पालखी उत्सव देखील साजरा करण्यात आलाय. महाशिवरात्रीच्या निमित्ताने बुधवारी पहाटे ३ वाजता मंदिरात पहिला अभिषेक करण्यात आला आणि आता मंदिर भाविकांसाठी खुले करण्यात आले आहे.

मंदिराच्या आयोजन समितीकडून सकाळी ८ ते संध्याकाळी ५ वाजेपर्यंत येणाऱ्या भाविकांच्या खाण्यापिण्याची सोय देखील तयार करण्यात आलीये. शिवरात्रीच्या निमित्तानेरात्री नाटकाचा कार्यक्रम आयोजित करण्यात आला असल्याची माहिती देखील अध्यक्ष यशवंत माडकर यांनी दिली.

हरवळे मंदिराचा आध्यात्मिक पर्यटनाच्या दृष्टीने विकास होणार - मुख्यमंत्री

हरवळे मंदिर परिसराचा "आध्यात्मिक पर्यटन"च्या दृष्टीने सुमारे १७ कोटी खर्चून विकास होणार असून यासाठी निविदा जारी करण्यात आला आहे. मंदिरात येणाऱ्या भाविकांनी स्वच्छता राखावी असे आवाहन मुख्यमंत्री डॉ. प्रमोद सावंत यांनी केले आहे. हरवळे येथे श्री रूद्रेश्वर देवस्थानात मुख्यमंत्री डॉ. प्रमोद सावंत यांनी पत्नी सुलक्षणा सावंत यांच्यासह उपस्थित राहून अभिषेक केला.

गोव्यात शिवरात्रीचा उत्सव:

राज्यात दरवर्षीच शिवरात्रीचा उत्साह दिसून येतो. शिवशंकरांच्या उपासनेसाठी शिवभक्त ठिकठिकाणी सकाळपासूनच मंदिरात दर्शनासाठी गर्दी करतात. दरवर्षीप्रमाणे यंदा देखील गोव्यात विविध ठिकाणी पूजा, अभिषेक, रुद्र पठण आदी कार्यक्रमांसह महाप्रसादाचे आयोजन बऱ्याच ठिकाणी करण्यात आले आहे. शिवभक्तांसाठी शिवरात्रीचा दिवस महत्वाचा मनाला जातो.