Mahadayi Water Dispute: म्हादईविषयी आम्ही केंद्र सरकारकडे आणि सर्वोच्च न्यायालयातही परखडपणे बाजू मांडत आहोत. त्याशिवाय कर्नाटक सरकारला विविध स्तरावर विरोध करण्यासाठी 4 महिन्यांत 15 ठिकाणी पत्रव्यवहार केलेला आहे.

प्रशासकीय पातळीवर राज्य सरकार हवे ते निर्णय घेत आले आहे. म्हादईचा सर्वोच्च न्यायालयातील लढा आम्ही जिंकू, असा विश्‍वास जलस्रोत मंत्री सुभाष शिरोडकर यांनी व्यक्त केला.

म्हादईच्या विषयावरील चर्चेत त्यांनी सरकारची बाजू मांडली. याप्रसंगी तत्पूर्वी विरोधी गटातील ॲड. कार्लुस फेरेरा म्हणाले की, म्हादईच्या विषयावर आमदार होण्यापूर्वी आपण एक समिती नेमण्याची मागणी केली होती.

म्हादईच्या विषयावर राजकारण बाजूला ठेवून एकत्रित येण्याची आवश्‍यकता आहे. ज्यावेळी अशी गंभीर स्थिती निर्माण होते, तेव्हा इंटरलॉक्ट ॲप्लिकेशन सादर करणे आवश्‍यक असते, हेही त्यांनी सहभागृहाच्या निदर्शनास आणून दिले.

स्वामी तिन्ही जगाचा...

विरोधी पक्षनेते युरी आलेमाव यांनी ‘स्वामी तिन्ही जगाचा, आई विना भिकारी,‘ या काव्यपंक्तीने सुरुवात केली. लोक आपणास पाहतात, तुम्ही काय केले ते. जेव्हा एक बिगरसरकारी संस्था साखळीत बैठक आयोजित करतात, त्यांना आम्ही पाठिंबा दिला.

आम्ही तेथे काही मत व्यक्त करणार नाही, ही पक्षाने भूमिका घेतली होती. मागील सरकारने कर्नाटकाला पर्यावरणीय संमती दिली होती, हेही त्यांनी सभागृहाला लक्षात आणून दिले.

यांनी मांडली मते

यावेळी आमदार कृष्णा साळकर, डॉ. चंद्रकांत शेट्ये, जेनिफर मोन्सेरात यांच्‍यासह रवी नाईक, सुदिन ढवळीकर, नीलेश काब्राल, रोहन खंवटे, मायकल लोबो, केदार नाईक, रुडॉल्फ फर्नांडिस, राजेश फळदेसाई, उल्हास तुयेकर, व्हेन्झी व्हिएगस, क्रूझ सिल्वा, एल्टन डिकॉस्ता, बाबूश मोन्सेरात, गोविंद गावडे, नीळकंठ हळर्णकर, सुभाष फळदेसाई, माविन गुदिन्हो यांनी आपली मते मांडली.