कर्नाटक सीमा भागातील कणकुंबी, पारवाड परिसरातून गोव्याकडे म्हादई नदीत येणारे पाणी उलट्या दिशेने वळविण्यासाठी कळसा-भांडुरा या उपनद्यांवरील प्रकल्पाला केंद्रीय जल आयोगाने मान्यता दिली आहे. यावरून गोव्यातील राजकीय वातावरण चांगलेच तापले आहे. मुख्यमंत्री प्रमोद सावंत यांनी देखील म्हादईप्रश्नी दोन दिवसांपासून बैठकींचा धडाका लावला आहे. तर, विरोधकांनी म्हादईवरून सरकारला धारेवर धरले आहे. दरम्यान, आम आदमी पक्षाचे आमदार आणि पदाधिकारी कळसा नदीपात्राची पाहणी करण्यासाठी चालले होते त्यावेळी त्यांची कणकुंबी येथे कर्नाटकच्या अधिकाऱ्यांनी अडवणूक केली.

कळसा या नदीपात्राची पाहणी करण्यासाठी गोव्यातील आपचे आमदार व्हेझी व्हिएगश आणि इतर पदाधिकारी जात होते. यावेळी त्यांना कणकुंबी येथे काही कर्नाटकच्या पदाधिकाऱ्यांनी अडकणूक केली. व त्यांना पुढे जाण्यास मज्जाव केला. यावेळी आपच्या नेत्यांनी त्यांना कर्नाटकच्या कथित अधिकाऱ्यांना ओळखपत्राची मागणी केली. त्याव त्या अधिकाऱ्यांने आमच्या कर्नाटकात येऊन आम्हालाच ओळखपत्र विचारता अशी उर्मट प्रतिक्रिया दिली. बराच काळ वाद झाला. दरम्यान, कर्नाटकच्या अधिकाऱ्यांना आपच्या पादाधिकाऱ्यांना विविध प्रश्न विचारून गोंधळात टाकले. या सर्व वादाचा व्हिडिओ सध्या समोर आला आहे.

दरम्यान, म्हादई पाणी तंटा लवादाने जे पाणी वाटप केले आहे, तेच पाणी आम्ही वळवतो आहे. म्हादईवरील प्रकल्पांना जल आयोगाने मंजुरी दिल्यामुळे गोवा कर्नाटकला प्रकल्प पूर्ण करण्यापासून रोखू शरत नाही. पुढील महिन्यापासून आम्ही कामाला सुरूवात करणार आहोत. आणि येत्या एक वर्षात हा प्रकल्प पूर्ण करणार आहोत. प्रकल्प झाला नाही तर मी स्वत:ला गोविंद करजोळ म्हणणार नाही, मी माझे नाव बदलेन. अशी प्रतिक्रिया कर्नाटकचे जलस्त्रोत मंत्री गोविंद करजोळ यांनी दिली आहे.