मडगाव: रेल्वे स्थानकावर महिलांना एकटे गाठून त्यांना लुबाडणाऱ्या चोरट्याला कोकण रेल्वे पोलिसानी जेरबंद केले आहे. अशोक घरात (५०) असे या संशयिताचे नाव असून तो महाराष्ट्रातील रायगड जिल्ह्यातील पनवेल येथील आहे.

३१ ऑगस्ट रोजी या संशयिताने मडगावच्या रेल्वे स्थानकावर प्लॅटफॉर्म क्रमांक सहावर एका महिलेच्या गळ्यातील १ लाख ६० हजार रुपये किमतीची सोनसाखळी हिसकावून नंतर पोबारा केला होता. संशयिताकडून ही सोनसाखळी पोलिसांनी हस्तगत केली आहे.

पोलिस निरीक्षक राहुल नाईक यांच्या मार्गदर्शनाखाली उपनिरीक्षक चंद्रकांत वेळीप पुढील तपास करीत आहेत.  वास्को येथील फिलोमिना रॉड्रिग्ज (वय ५९)  यांची सोनसाखळी संशयिताने हिसकावून पळ काढला होता.

फिलोमिना केअर टेकर म्हणून काम करतात. वास्कोहून  त्या रेल्वेतून मडगावला येऊन कारवारला जाणाऱ्या रेल्वेच्या प्रतीक्षेत असताना  अशोकने त्यांची  सोनसाखळी पळविली होती.

फिलोमिना हिला तातडीने त्या दिवशी कारवारला जायचे असल्याने ती रेल्वेने गेली. नंतर ती बंगळूर येथे केअर टेकर म्हणून कामाला  गेली होती. आपली सोनसाखळी चोरीला गेल्याची माहिती तिने आपल्या त्या मालकाला दिल्यानंतर त्यांनी यासंबधी  गोव्यात जाऊन  पोलिसात तक्रार नोंद करण्यास सांगितले.

मागाहून  यासंबंधी तक्रार नोंद झाल्यानंतर पोलिसांनी तपास सुरू करून संशयिताला अटक केली.  तपासात संशयित ही  सोनसाखळी चोरल्यानंतर रेल्वेने  कर्नाटकला  गेल्याचे  उघडकीस आले. कुमठा येथे तो गेला होता. तेथे त्याने चोरलेली सोनसाखळी विकण्याचा प्रयन्त  केला. मात्र कुणी विकत न घेतल्याने त्याने परत गोवा गाठला होता. 

पोलिसात याबाबत तक्रार नोंद झाल्यानंतर रेल्वे स्थानकावरील सीसीटीव्ही फुटेजवर अशोकची  छबी टिपली  गेली होती. त्याच्या आधारे पोलिसांनी शोध कार्याला सुरवात केली. मडगावातील काही सराफाकडे त्याने सोनसाखळी विकण्याचा प्रयन्त  केला, मात्र तोही फोल ठरला. त्याच्या मागावर असलेल्या पोलिसांनी नंतर  त्याला पकडले.