Konkan Railway Police Seized 514.5kgs of suspected Bovine meat

मडगाव: कोकण रेल्वे पोलिसांनी मोठी कारवाई करत मडगाव रेल्वे स्थानकाच्या पार्सल कार्यालयातून सुमारे ५१४.५ किलो गोमांस जप्त केलं आहे. या गोमांसाची अंदाजे किंमत १ लाख ५४ हजार ३५० रूपये असून, हे गोमांस बेकायदेशीरपणे वाहतूक केलं जात होतं.

पोलिसांच्या माहितीनुसार, हे गोमांस दिल्लीतील हजरत निजामुद्दीन रेल्वे स्थानकातून पाठवण्यात आलं होतं. या प्रकरणी फयाज अहमद मोहम्मद हनीफ केंगेनावर (वय ३७) याला अटक करण्यात आली आहे.

त्याच्यावर गोवा प्राणी संरक्षण कायदा आणि रेल्वे कायद्याच्या तरतुदींचं उल्लंघन केल्याचा आरोप ठेवण्यात आला आहे.

कोकण रेल्वेचे पोलीस अधीक्षक आणि कोकण रेल्वेचे पोलीस उपअधीक्षक यांच्या देखरेखीखाली पोलीस निरीक्षक सुनील गुडलर, पीएसआय रुझवेल्ट फर्नांडिस, पीसी शेख इर्शाद, पीसी मोहम्मद हुसेन यांनी ही कारवाई केली आहे.

या प्रकरणाचा पुढील तपास कोकण रेल्वे पोलिसांकडून सुरू आहे. गोवा प्राणी संरक्षण कायद्याच्या कठोर तरतुदींनुसार पुढील कारवाई केली जाणार आहे. तसंच, या मांस वाहतुकीच्या नेटवर्कचा तपास करून अन्य कोण या प्रकरणात सामील आहे का? याचा तपास पोलीस करत आहेत.