LPG Gas Cylinder Price Hike In Goa From 1st December

पणजी: एलपीजी सिलिंडरची दरवाढ १ डिसेंबरपासून अंमलात आली आहे. व्यावसायिक सिलिंडरच्या दरातील वाढीचा रेस्टॉरंट, हॉटेल व इतर लघु उद्योगावर परिणाम दिसून येणार आहे. मागील पाच महिन्यांत व्यावसायिक सिलिंडरचा दर १६६ रुपयांनी वाढला आहे.

आत्ता झालेली दरवाढ पुढे आणखी काही काळ अशीच होत राहिल्यास खाद्यपदार्थ व जेवणाच्या दरातही वाढ होण्याची शक्यता नाकारता येणार नाही. दरम्यान, घरगुती सिलिंडरच्या (१४.२ किलो) दरामध्ये मात्र कोणताही बदल झालेला नाही.

देशभरात व्यावसायिक सिलिंडरच्या दरात वाढ झाली असून, मोठ-मोठ्या शहरांमध्ये वेगवेगळी वाढ झाली आहे. ही दरवाढ १६.५० ते १८.५० रुपयांपर्यंत आहे. मोठ्या शहरातील व्यावसायिक सिलिंडरचा दरावर नजर टाकली तर दिल्लीतील १९ किलो सिलिंडरचा दर १८०२ रुपयांवरून १,८१८.५० रुपये झाली आहे. कोलकातामध्ये तो दर १,९२७ रुपयांवर पोहोचला आहे. मुंबईत १६.५० रुपयांनी वाढ होऊन तो १,७७१ रुपयांवर गेला आहे, तर गोव्यात हा दर १,८८६.५० वर गेला आहे.

गुड रिटर्न्स या संकेतस्थळावरून उपलब्ध माहितीनुसार ऑगस्ट महिन्यांपासून व्यावसायिक सिलिंडरच्या दराचा विचार केला तर १६६.०० रुपयांनी वाढ झाली आहे. तर वर्षभरात आठ महिन्यांत २१३ रुपयांनी व्यावसायिक सिलिंडरची दरवाढ झाल्याचे दिसून येते.

याशिवाय एप्रिल ते जुलै या चार महिन्यांत व्यावसायिक सिलिंडरचे दर १५२ रुपयांनी कमी झाल्याचे दिलेल्या तपशिलावरून दिसून येते. वर्षाच्या शेवटच्या महिन्यात ही वाढ झाल्याने खाद्य पदार्थांचे दर वाढण्याची शक्यता नाकारता येत नाही. व्यावसायिक सिलिंडरचे दर वाढले असले तरी घरगुती सिलिंडरचे दर न वाढवता सरकारने नागरिकांना दिलासा दिला आहे.