मडगाव : गोव्यात घरफोड्यांचे प्रमाण वाढले आहे. काल पहाटे लोटली येथील एका घरात चोरट्यांनी प्रवेश करून सुमारे ११ लाखाचे दागिने लंपास केले. ब्रिमा क्वाद्रूश यांनी या संदर्भात मायणा कुडतरी पोलिसात तक्रार दिली असून पोलीस या प्रकरणी तपास करीत आहेत. ही घरफोडी पहाटे दीड ते दोनच्या सुमरास घडली.

रात्रीच्या वेळी चोरट्यांनी मागील दरवाजातून घरात प्रवेश करून ही चोरी केल्याचे या तक्रारीत म्हटले आहे. या घराचे खरे मालक ‘युके’ मध्ये स्थायिक असून या घरात तीन चारच माणसे राहतात. काल या घरात ब्रीमा आणि आणखी एक मुलगी झोपली होती. ते दोघेही गाढ झोपेत असताना या चोरट्यांनी मागच्या दरवाज्यातून घरात प्रवेश करून कपाटे फोडून आतील सोन्याचे दागिने घेऊन पळ काढला.

या चोरीत नेमका किती ऐवज चोरट्यांनी पळविला याचा तपशील सध्या पोलीस घेत आहेत. या भागात असलेल्या सीसी टीव्ही कॅमेऱ्याच्या छबीची पडताळणी केली जात असल्याचे पोलीस निरिक्षक अरुण देसाई यांनी सांगितले.