South Goa :

मडगाव, लोकसभा निवडणुकीसाठी मतदान होऊन दोन दिवस उलटल्यानंतर काँग्रेस पक्ष किमान ७ हजार मताधिक्य घेऊन दक्षिण गोव्यातून जिंकेल, असा दावा काँग्रेसच्या काही विश्लेषकांनी केला आहे.

मागील जिल्हा पंचायत निवडणुकांतही सदर विश्लेषकांनी काँग्रेस संपूर्ण गोव्यात केवळ ५ जागा जिंकेल, असे त्यावेळचे विरोधी पक्षनेते दिगंबर कामत यांना सांगितले होते. त्यानंतर झालेल्या विधानसभा निवडणुकीत काँग्रेस केवळ दोन अंकी जागा जिंकेल, हे त्यांचे भाकीतही खरे ठरले होते.

७ मे रोजी झालेल्या लोकसभा निवडणुकांत फोंडा तालुक्यातील फोंडा, मडकई व शिरोडा मतदारसंघात ३,५१५ तसेच मुरगाव तालुक्यातील मुरगाव, वास्को, दाबोळी व कुठ्ठाळी मतदारसंघात ६,९७५ अधिक मतदान झाले आहे.

२०१९च्या तुलनेत २०२४ मध्ये एकूण १०हजार मते या दोन तालुक्यात वाढली आहेत. त्याचबरोबर सासष्टी तालुक्यातील नुवे, कुडतरी, फातोर्डा, मडगाव, बाणावली, नावेली, कुंकळ्ळी व वेळ्ळी या आठ मतदारसंघातही १०,७६८ जास्त मतदान झाले आहे.

केपे, कुडचडे, सावर्डे व सांगे ह्या मतदारसंघात एकूण २०१९ च्या तुलनेत यंदा ८,५४९ मतदान जास्त झाले आहे, हे आकडेवारीवरून स्पष्ट होते.

असा आहे कल

१ एकंदर मतदानाचा कल पाहता, फोंडा ते कुठ्ठाळी या सात मतदारसंघात भाजपला ३५ हजार मतांची आघाडी मिळू शकते. सासष्टीत मडगावात भाजप ८ हजार मतांची आघाडी घेईल. परंतु, सासष्टीतील उर्वरित सात मतदारसंघात कॉंग्रेसला ७४ हजारांची प्रचंड आघाडी मिळेल, असा विश्‍लेषकांचा अंदाज आहे.

२ केप्यात ४ हजार तर कुडचडे मतदारसंघात एक हजार मतांची आघाडी कॉंग्रेस घेईल, असा दावा सदर विश्लेषकांनी केला आहे. सावर्डे, सांगे आणि काणकोण मतदारसंघात भाजपला २९ हजारांचे मताधिक्य मिळणार असल्याचा अंदाज वर्तवण्यात आला आहे.