सासष्टी: वेर्णा औद्योगिक पठारावरील संभाव्य कचरा प्रकल्पाला स्थानिकांचा विरोध होत आहे. स्थानिकांनी या प्रकल्पाबद्दल कित्येकदा आवाज उठविला आहे. यासंदर्भात स्थानिक लोक पर्यावरणमंत्री व नुवेचे आमदार आलेक्स सिक्वेरा यांच्याशी बैठकीसाठी इच्छुक असले तरी स्वत: मंत्री या बैठकीला राजी नाहीत.

कचरा प्रकल्पाबद्दलच्या स्थानिकांच्या भावना आपल्याला कळलेल्या आहेत व या भावना आपण मुख्यमंत्र्यांच्या कानावर घातलेल्या आहेत. त्यामुळे त्यासाठी वेगळी बैठक घेण्याची गरज भासत नसल्याचे मंत्री सिक्वेरा यांचे मत आहे.

स्थानिक मात्र मंत्र्यांच्या या भूमिकेबद्दल नाराज आहेत. आम्ही त्यांना आमच्या समस्या लेखी देणार होतो, असे त्यांचे म्हणणे आहे. मात्र, मंत्री सांगतात की, आपल्याला या प्रकल्पाबद्दल समस्या माहीत आहेत. याबद्दल आपण विधानसभेतही बोललो आहे.

जेव्हा स्थानिक लोक संबंधित मंत्र्याला भेटण्यासाठी सचिवालयात आले होते तेव्हा मी माझ्या केबिनमध्ये होतो. तेव्हा ते आपल्याला का भेटले नाहीत, असा दावा मंत्री सिक्वेरा करतात.

आपण घरी किंवा दर शुक्रवारी जिल्हाधिकारी कचेरीत उपलब्ध असतो. जर त्यांना आपल्याला भेटायचे असेल तर त्यांनी यापैकी कुठल्याही एका ठिकाणी यावे. वेर्णा पठारावरील संभाव्य कचरा प्रक्रिया प्रकल्पाबद्दल आपल्या काय भावना आहेत त्या आपण योग्यवेळी जाहीर करू, असेही मंत्री सांगतात.