पणजी : गोव्यात पर्यटन हंगाम सुरु होताच पर्यटकांची गर्दी ठिकठिकाणी दिसू लागली आहे. पर्यटकांना आकर्षित करण्यासाठी मनोरंजनाचे कार्यक्रमही आयोजित केले जात आहेत. मात्र हेच कार्यक्रम आता सर्वसामान्य गोवेकरांसाठी डोकेदुखी ठरताना दिसत आहेत. बीचवर होणाऱ्या संगीत रजनींमुळे स्थानिकांमध्ये नाराजीचं वातावरण आहे.

मडगाव (Madgaon) परिसरातील किनाऱ्यांवर पर्यटकांची नेहमीच वर्दळ पाहायला मिळते. समुद्रकिनाऱ्यांवर पर्यटकांसाठी विविध कार्यक्रमही आयोजित केले जातात. या कार्यक्रमांमध्ये मोठ्या आवाजात संगीत वाजवलं जातं, ज्याचा त्रास स्थानिकांना होताना दिसत आहे. केळशी बीचमध्येही अशाचप्रकारे खासगी बीचवर (Beach) आयोजित केलेल्या कार्यक्रमाविरोधात आता स्थानिक आक्रमक झाले आहेत. मच्छिमारांनीही या कार्यक्रमावर आक्षेप घेतला आहे.

केळशीतील खासगी बीचवर आयोजित केलेल्या कार्यक्रमामुळे मासेमारीला धोका निर्माण झाल्याचा आरोप मच्छिमारांनी केला आहे. तर स्थानिकांनी या कार्यक्रमाच्या आयोजनासाठी उभारलेल्या सेटअपमुळे नियमांची पायमल्ली होत असल्याचा आरोप केला आहे. स्थानिक पंचायतीने मात्र या कार्यक्रमाला रितसर परवानगी घेण्यात आल्याचं स्पष्ट केलं आहे. तसंच गोवा राज्य किनारपट्टी व्यवस्थापन प्राधिकरणाची ना हरकत पाहिल्यानंतरच दिल्याचंही सांगितलं आहे. या कार्यक्रमाला विरोध करणाऱ्या स्थानिकांना अटक (Arrest) करण्याचा इशारा दिल्यानंतर काहीकाळ वातावरण तापल्याचं चित्र होतं.

स्थानिकांना खासगी बीचवरील कार्यक्रमाच्या आयोजकांनी याप्रकरणी हस्तक्षेप न करण्याची तंबी दिली. यानंतर संतप्त स्थानिकांनी याप्रकरणी राष्ट्रीय हरित लवादाकडे दाद मागणार असल्याचं स्पष्ट केलं आहे. बीचच्या रक्षणासाठी आणि संवर्धनासाठी प्रयत्नशील असल्याचा दावा स्थानिकांनी करत अशा प्रकारच्या कार्यक्रमांना तीव्र विरोध दर्शवला आहे.