पणजी: 'नावात काय आहे' हे शेक्सपिअरचे विधान पुढे वाक्प्रचार ठरला. परंतु ह्याच नावाच्या मुद्यावरून सोमवारी (०४ ऑगस्ट) विधानसभेत गंभीर चर्चा झाली.

नाव आणि आडनावातील बदल कायद्याअंतर्गत ज्यांनी नावे आणि आडनावांत बदल केलेले आहेत, अशा सर्व प्रकरणांची चौकशी केली जाईल आणि ज्यांनी कायद्याचे उल्लंघन केलेले आहेत, अशांना तीन वर्षांपर्यंतच्या तुरुंगवासाची शिक्षा दिली जाईल, अशी ग्वाही मुख्यमंत्री डॉ. प्रमोद सावंत यांनी सोमवारी विधानसभा सभागृहात दिली. आमदार विजय सरदेसाई यांनी दाखल केलेल्या लक्षवेधी सूचनेला उत्तर देताना ते बोलत होते.

परराज्यांतून गोव्यात येऊन राहणारे अनेकजण नावे आणि आडनावांत बदल करून गोव्यातील आडनावे लावतात. तसेच सरकारी योजनांचा लाभ घेत आहेत. अशी प्रकरणे वाढत असल्याने गोव्याची ओळख नष्ट होत असल्यावा दावा आमदार सरदेसाई यांनी केला. विरोधी पक्षनेते युरी आलेमाव, आमदार विरेश बोरकर, व्हेंझी व्हिएगश, कार्लस फेरेरा, आल्टन डिकॉस्टा यांनीही सरदेसाई यांनी सूचनेला पाठिंबा दिला.

... तर कायद्यातही बदल करू!

१) नावे आणि आडनावे बदलल्याच्या प्रकरणांचा अभ्यास पूर्ण झाल्यानंतर आवश्यकता भासल्यास कायद्यातही बदल करण्याची हमीही मुख्यमंत्री डॉ. प्रमोद सावंत यांनी दिली.

२) बेकायदेशीररीत्या सुरू असलेली अशी प्रकरणे रोखण्यासाठी कायद्यात बदल करा, अशी मागणी आमदार सरदेसाई यांनी केली होती.