केरी समुद्रकिनारी घडलेल्या दुर्घटनेबाबत मोठी अपडेट हाती येतेय. नो सेल्फी झोनचा फलक लावलेला असूनही त्या चौघांना सेल्फीचा मोह आवरला नाही. समुद्रालगतच्या खडकाळ भागात ते चौघे गेले आणि त्यातूनच ही घटना घडल्याची माहिती प्रत्यक्षदर्शींनी दिली आहे.

या विषयी सविस्तर माहिती अशी की, केरी समुद्रकिनाऱ्यावर अंदाजे 23 जणांचा ग्रुप फिरण्यासाठी आला होता. त्यातील चौघेजण किनाऱ्यालगतच्या खडकाळ भागात सेल्फी घेण्यासाठी गेले असल्याचे तेथील स्थानिकांचे म्हणणे आहे.

महत्वाची गोष्ट म्हणजे ज्या ठिकाणी ही मुलं सेल्फी घेण्यासाठी गेली तिथे प्रशासनामार्फत 'डेंजर झोन आणि नो सेल्फी' असे लिहिलेला बोर्ड आहे. असे असून देखील त्यांना सेल्फीचा मोह आवरला नाही आणि त्यांचा तोल गेल्याने ही दुर्घटना घडली.

बुडालेली मुले ही एकाच कुटुंबातील असून त्यापैकी दोघांचे मृतदेह सापडले आहेत तर अन्य दोघांचा शोध सुरु आहे. दरम्यान त्यांनी केलेल्या फोटोशूटमुळेच हा प्रकार घडल्याचे आता समोर येतंय.

गोव्यात येणाऱ्या पर्यटकांनी जीवघेणे स्टंट करू नये, आपल्या सुरक्षिततेची काळजी घ्यावी तसेच प्रशासनाकडून दिलेल्या मार्गदर्शक सूचनांचे पालन करावे असा सूर स्थानिकांमधून आता उमटत आहे.