Goa Crime News: अबकारी खात्याच्या काणकोणमधील अधिकाऱ्यांनी कारवारच्या बाजूने जाणाऱ्या केए ४७ ए ४४७६ या वाहनातून पोळे तपासणी नाक्यावर अवैध मार्गाने नेणारी ५ लाख ८ हजार ८०० रुपयांची दारू वाहनासह जप्त केली.

बुधवारी (ता.२९) रात्री अबकारी खात्याचे काणकोणमधील निरीक्षक शंबा नाईक यांच्या मार्गदर्शनाखाली ही कारवाई केली. वाहनचालक मल्लिकार्जुन हिरेमठ याला ताब्यात घेण्यात आले आहे.

या वाहनांत २२५ बॉक्समध्ये वेगवेगळ्या ब्रँडची दारू होती. ही दारू एका मासे वाहतूक करणाऱ्या कंटेनरमधून नेत होते. कंटेनरच्या पुढील बाजूस मासे वाहतूक करण्यासाठी वापरण्यात येणाऱ्या बर्फने भरलेल्या क्रेट्‌स ठेवून दारूचे बॉक्स लपविले होते.

वाहन पोळे तपासणी नाक्यावर पोहोचल्यावर अबकारी खात्याच्या कर्मचाऱ्यांनी वाहनांची तपासणी केली असता हा प्रकार उघडकीस आला.

चालकांची अदलाबदली

अबकारी खात्याच्या कर्मचाऱ्यांनी वाहन चालकाला ताब्यात घेतले आहे. हा चालक मूळ बिजापूर-कर्नाटक येथील असून त्याला दुसऱ्या एका वाहनचालकाने बाळ्ळी येथे हा कंटेनर अंकोला येथे नेण्यास सांगितले.

तेथून दुसरा वाहनचालक कंटेनर घेऊन पुढे जाणार होता, अशी जबानी या वाहनचालकाने दिल्याचे अबकारी निरीक्षक शंबा नाईक यांनी सांगितले.