Airoplane Liquor Smuggling

पणजी: गोव्यातून अन्य राज्यात दारूच्या तस्करीसाठी अनेक मार्गांचा अवलंब आजवर केला गेला आहे. आता विमानातून अशी तस्करी होत असल्याचे आज उघड झाले. गोव्यातून हैदराबाद येथे गेलेल्या तीन विमानांतील काही प्रवाशांकडून दारू जप्त केली आहे.

हैदराबाद येथील शमशाबाद येथील राजीव गांधी आंतरराष्ट्रीय विमानतळावर प्रवाशांकडून १२ लाख रुपयांच्या ४१५ दारूच्या बाटल्या जप्त केल्या आहेत. विमानतळावरील सुरक्षा यंत्रणांना ही दारू सापडू नये यासाठी बबल व्रॅपमध्ये या बाटल्या गुंडाळण्याची क्लृप्ती वापरण्यात आली होती. मात्र, हैदराबाद येथे तेथील अबकारी अधिकाऱ्यांनी संशयावरून या प्रवाशांचे साहित्य तपासले असता त्यात त्यांना दारूच्या बाटल्या आढळून आल्या. कर न भरता या बाटल्या आल्याने त्या जप्त केल्या आहेत.

मद्य तस्करीची चौकशी सुरू

अबकारी खात्याने पी. व्यंकटेश, श्रीराम, जी. श्रावण, एम. रामकृष्ण, राजीरेड्डी, रघू गौड, के. हरीश यादव या सात जणांविरोधात गुन्हा नोंदवला आहे. त्यांनी ही दारू गोव्यात कुठे घेतली. गोव्यातील विमानतळावर ही दारू कशी पकडली गेली नाही.

ही दारू त्यांनी व्यक्तीगत वापरासाठी आणली होती की विकण्यासाठी, त्यांनी या दारूची वाहतूक अन्य कोणाच्या सांगण्यावरून केली आहे का, याचा तपास अबकारी खाते करणार आहे. यासाठी या सातही जणांना चौकशीसाठी बोलावले गेले आहे.