Goa Murder Case

वेळसांव येथे समुद्रकिनार्‍यालगत कर्नाटकच्या मच्छीमाराचा २ एप्रिल २०२१ रोजी खून झाल्याचे उघडकीस आले होते. याप्रकरणी उत्तर प्रदेश आणि ओडिशा येथील दोघांना अटक करण्यात आली होती.

खून प्रकरणातील दोन्ही आरोपींना न्यायालयाने दोषी ठरवले असून, जन्मठेपेची शिक्षा सुनावली आहे.

वेळसांव येथे समुद्रकिनार्‍यालगत मद्याच्या नशेत दिनेश कुमार व शिवनाथ मांझी या दोघांनी लालू ऊर्फ सनी सिंग याचा खून केल्याचे उघडकीस आले होते. सनी सिंग याचा मृतदेह २ एप्रिल २०२१ रोजी एका शेडमध्ये आढळून आला होता.

वेर्णा पोलिसांनी तपासाअंती दिनेश कुमार भारतीय (46, उत्तर प्रदेश) आणि शिवनाथ मांझी (48, ओडिशा) या दोघांना अटक केली होती.

दारुच्या नशेत वाद, वादातून हाणामारी

दिनेश कुमार, शिवनाथ मांझी यांचा दारु पिण्यावरुन लालू ऊर्फ सनी सिंग यांच्यासोबत वाद झाला. वादाचे रुपांतर हाणामारीत झाले. यातून दिनेश आणि शिवनाथ यांनी लालूच्या डोक्यात दांडकाने मारहाण करुन जखमी केले, यातच त्याचा मृत्यू झाला, असे तपासातून समोर आले.

न्यायालयाने याप्रकरणी दिनेश कुमार, शिवनाथ मांझी यांना दोषी ठरवून जन्मठेपेची शिक्षा सुनावली आहे.