डिचोली: शहरात पुन्हा एकदा बिबट्याने दर्शन दिले असून शहरातील साष्टीवाडा -शांतारामनगर परिसरात बिबट्या दडून बसल्याची माहिती समोर आली आहे. गेल्या तीन-चार दिवसांपासून भर लोकवस्तीजवळ या बिबट्याची दहशत सुरु आहे. हा बिबट्या रात्रीचे सोडाच, दिवसाही संचार करीत आहे. लोकवस्तीजवळ बिबट्या फिरत असल्यामुळे स्थानिक लोक भयभीत बनले आहेत.

ज्या भागात बिबट्या नजरेला पडला आहे. तेथून विद्यार्थ्यांची ये-जा असते. त्याठिकाणी मुलेही खेळत असतात. त्यामुळे विद्यार्थ्यांसह लहान मुलांच्या जीविताला धोका निर्माण होऊ शकतो, अशी भीती पालक व्यक्त करीत आहेत.

वन खात्याने त्वरित उपाययोजना करुन या बिबट्याला पकडावे, अशी मागणी निवृत्त शिक्षक दिनानाथ तारी यांच्यासह स्थानिकांनी केली आहे. शांतारामनगर परिसरात फिरताना हा बिबट्या माझ्या नजरेला पडला, असे स्थानिक समाजकार्यकर्ते विश्वास गावस यांनी सांगितले.

सापळा लावून या बिबट्याला पकडावे, अशी मागणी निवेदनाद्वारे वन खात्याकडे केली आहे, असेही त्यांनी सांगितले.

तीन महिन्यांपूर्वी झाले हाेते दर्शन...

तीन महिन्यांपूर्वी शहरातील कृष्णानगर भागात एका बिबट्याने दहशत घातली होती. तत्पूर्वी, व्हाळशी येथील संकल्प गार्डन वसाहतीत तेथील रहिवाशांना बिबट्याचे दर्शन झाले होते. दीड वर्षापूर्वी शहरातील धबधबा परिसरात दोन बिबटे पकडण्यात आले होते.

दोन महिन्यांपूर्वी धबधबा येथे पुन्हा एकदा बिबट्याची दहशत सुरु होती. गेल्यावर्षी साष्टीवाडा-बोर्डे येथे कारची धडक बसून एक बिबट्या जखमी झाला होता. तत्पूर्वी, लामगाव परिसरातही बिबट्याने दहशत घातली होती. त्यामुळे डिचोली परिसरात बिबट्यांचा अधिवास असल्याचे स्पष्ट होत आहे.