डिचोली: डिचोली शहरातील धबधबा, लामगाव आणि साष्टीवाडा-बोर्डेनंतर आता व्हाळशी परिसरात बिबट्याचा संचार असल्याने स्थानिक भयभीत झाले आहेत. व्हाळशी येथील संकल्प उद्यान परिसरात भर लोकवस्तीजवळ एक बिबटा फिरत असून त्याची दहशत सुरू असल्याची माहिती मिळाली आहे.

दरम्यान, स्थानिकांच्या तक्रारीनंतर गेल्या आठवड्यात वन खात्याने वसाहतीत कॅमेरा लावून दोन दिवस टेहळणी केली. मात्र, बिबटा असल्याच्या कोणत्याच खाणाखुणा आढळून आल्या नाहीत अशी माहिती मिळाली आहे, तर वसाहतीजवळ बिबट्याचा संचार आहेच असा स्थानिकांचा दावा असून या बिबट्याचा बंदोबस्त करावा, अशी स्थानिकांची मागणी आहे.

डिचोली शहरातील विविध भागात बिबट्यांची दहशत वाढली आहे. गेल्या दीड वर्षात वन खात्याने धबधबा परिसरात दोन बिबट्यांना पकडण्यात यश मिळवले आहे, तर आठ महिन्यांपूर्वी गेल्या जानेवारी महिन्यात साष्टीवाडा-बोर्डे परिसरात मुख्य रस्त्यावर कारच्या धडकेत एक बिबटा जखमी झाला होता.

लामगाव परिसरातही एका बिबट्याचा संचार वाढला होता. यावरून शहरात बिबट्यांची दहशत असल्याचे स्पष्ट होत आहे.

‘कुत्री भुंकली म्हणून बाहेर पाहिले तर बिबटा!’

व्हाळशी परिसरात फिरणारी चार ते पाच भटकी कुत्री सध्या गायब असून, या कुत्र्यांना या बिबट्याने फस्त केल्याची माहिती समोर आली आहे. गेल्या आठवड्यात रात्रीच्यावेळी साधारण साडेदहा वाजता कुत्री जोरजोरात भुंकत होती. नंतर बाहेर बघितले तर घरासमोर बिबटा उभा होता, अशी माहिती रत्नदीप देसाई यांनी दिली.