फोंडा: बिबट्याचा बछडा थेट घरात शिरतो आणि खुर्चीखाली जाऊन आरामात बसतो, तेव्हा त्या घरातील लोकांची अवस्था काय झाली असेल हे सांगणेच मुश्‍किल. पण हा थरारक प्रकार तरवळे - शिरोड्यातील लाला नाईक यांच्या घरात घडला.

हल्ली सिद्धनाथ पर्वतावर बिबट्यांचा वावर वाढला आहे. फोंडा तालुक्यात विविध ठिकाणी बिबटे दृष्टीस पडत असतानाच आज बिबट्याचा बछडा थेट घरात शिरल्याने ही घटना भीतीयुक्त चर्चेचा विषय बनली आहे. सविस्तर माहिती अशी, की दुपारी बाराच्या सुमारास हा बछडा मातेपासून विभक्त होऊन डोंगरमाथ्यावरून खाली आला आणि लाला नाईक यांच्या घराच्या दिशेने निघाला. मात्र, लोखंडी गेटमधून घरात शिरण्याच्या प्रयत्नात हा बछडा लोखंडी सळ्यांमध्ये अडकला. बिबट्याला पाहून तेथील कुत्र्यांनी भुंकायला सुरुवात केल्यामुळे लोकांना हा प्रकार समजला.

गेटमध्ये अडकल्यानंतर बछड्याने सुटका करून घेण्याचा जोरदार प्रयत्न केला. दहा-पंधरा मिनिटे या झटापटीतच गेल्यानंतर शेवटी कशीबशी गेटमधून बछड्याने स्वत:ची सुटका करून घेतली आणि घरातील खुर्चीच्या खाली आसरा घेतला. त्यामुळे घाबरलेल्या नाईक कुटुंबीयांनी वन खात्याला यासंबंधीची माहिती देताच वन कर्मचाऱ्यांनी घटनास्थळी येऊन बछड्याला ताब्यात घेतले आणि त्याची रवानगी वन खात्याच्या फिरत्या उपचार केंद्रात केली.

दरम्यान, मातेपासून विभक्त झालेला हा बछडा एकच आहे, की या परिसरात आणखी बछडे आहेत, याचा तपास करताना त्यांच्या मातेचाही शोध घेणार असल्याची माहिती वन खात्याच्या अधिकाऱ्यांनी दिली.

वन्य प्राण्यांची दहशत कायम

तरवळे येथील डोंगर भागातून हा बछडा लोकवस्तीत शिरला असावा, असा अंदाज व्यक्त करण्यात येत आहे. सुमारे पाच महिन्यांचा हा मादी बछडा असून तो सुखरूप आहे. बिबट्याचा बछडा थेट घरात शिरल्याने या परिसरात भीतीचे वातावरण निर्माण झाले असून वन खात्याने बिबट्यांना दूर रानात हुसकावून लावण्यासाठी प्रयत्न करावेत, अशी मागणी स्थानिकांनी केली आहे.