पणजी: आरोग्यमंत्री राणे यांनी रविवारी एका वृत्तवाहिनीशी बोलताना डॉ. कुट्टीकर व त्यांच्या कुटुंबीयांची माफी मागितली असली तरी गोवा वैद्यकीय महाविद्यालयामधील निवासी डॉक्टरांनी राणे यांच्याविरुद्धचा आपला पवित्रा कायम ठेवला आहे. २४ तासांच्या आत राणे यांनी आपत्कालीन विभागात प्रत्यक्ष येऊन जाहीर माफी मागावी अन्यथा, डॉक्टरांचे आंदोलन सुरूच राहील, असा इशारा त्यांनी सोमवारी (०९ जून) दिला.

पत्रकार परिषदेत बोलताना डॉ. रुद्रेश कुट्टीकर यांनी स्पष्ट सांगितले, "माझा अपमान ज्या आपत्कालीन विभागात झाला, तिथेच मंत्री राणेंनी माझी जाहीर माफी मागावी. तोपर्यंत आंदोलन थांबणार नाही. दरम्यान, आम्ही केवळ आपत्कालीन रुग्णांना सेवा देणार असून अन्य सेवा बंद ठेवत आहोत. मी एक डॉक्टर आहे, मी फक्त माझे कर्तव्य करत होतो. माझ्यावर सार्वजनिकरीत्या अपमानास्पद शब्दांत टीका झाली. त्यामुळे हा फक्त माझा नव्हे तर संपूर्ण वैद्यकीय क्षेत्राचा अपमान आहे," असेही त्यांनी स्पष्ट केले.

मंत्री विश्वजीत राणे यांनी रविवारी रात्री डॉ. रुद्रेश यांना कठोर शब्द वापरल्याबद्दल मनापासून दिलगिरी व्यक्त केली. त्यांनी डॉक्टरांप्रती आदर व्यक्त करत, सर्व डॉक्टरांनी पुन्हा सेवेत रुजू व्हावे, असे आवाहन देखील केले आहे.

डॉ. बांदेकर म्हणाले की, "विभागासाठी ४ विभागप्रमुखांच्या मार्गदर्शनाखाली कडक एसओपी तयार केली जाणार, आता केवळ आपत्कालीन रुग्णांचीच सेवा घेण्यात येईल आणि अनावश्यक गर्दीला परवानगी दिली जाणार नाही."

काय आहेत आंदोलक डॉक्टरांच्या मागण्या?

- आरोग्यमंत्री विश्वजीत राणेंनी आपत्कालीन विभागात येऊन डॉ. रुद्रेश यांची माफी मागावी.

- व्हिडिओग्राफी करणाऱ्याविरुद्ध डीनने पोलिसात एफआयआर नोंदवावा.

- जीएमसीमधील व्हीआयपी संस्कृती तात्काळ बंद करावी.

आता व्हिडिओ काढण्यास बंदी

गोमेकॉचे डीन डॉ. शिवानंद बांदेकर यांनी पत्रकारांना संबोधित करताना सांगितले की, व्हिडिओ रेकॉर्ड करणाऱ्यावर गुन्हा दाखल करण्याची मागणी 'गार्ड' ने केली असून, त्यासाठी आगाशी पोलिसांना बोलाविण्यात आले आहे.

दरम्यान काही निर्णय घेतल्याचेही त्यांनी स्पष्ट केले. ते म्हणाले की, आपत्कालीन विभागात व्हिडिओ रेकॉर्ड करणाऱ्याविरोधात 'एफआयआर' दाखल केला जाणार आहे. यापुढे आपत्कालीन विभागात फोटोग्राफी/व्हिडिओग्राफी बंद केली जाईल, तसेच पोलिस देखील तैनात राहणार आहेत.

सध्याची स्थिती

- जीएमसीमध्ये इमर्जन्सी केसेस वगळता सर्वसाधारण सेवा बंद.

- डॉक्टरांचे आंदोलन सुरु

- २४ तासांत माफी न आल्यास आंदोलन आणखी तीव्र होण्याची शक्यता.

- वैद्यकीय व्यवस्थापनाने तातडीने हस्तक्षेप करण्याची गरज