Raid in Goa : गोव्यात कमी वजनाचे गॅस सिलिंडर ग्राहकांची फसवणूक करण्याचे प्रकार वाढले आहेत. पर्वरी येथे आज टाकलेल्या धाडीत हा धक्कादायक प्रकार उघड झाला असून ग्राहकांनी योग्य ती काळजी घेतल्यास सदर प्रकार बंद होऊ शकतात, अशी माहिती लीगल मेट्रोलॉजी खात्याचे सहाय्यक आयुक्त अरुण पंचवाडकर यांनी दिली आहे.

पर्वरी येथील कदंबाच्या वर्कशॉपजवळच्या तळकर गॅस एजन्सीवर आज गुरुवारी सकाळी लिगल मेट्रोलोजी खात्यातर्फे सहाय्यक आयुक्त अरुण पंचवाडकर यांच्या नेतृत्वाखाली धाड टाकली. यावेळी सिलेंडरची तपासणी केली असता जवळपास 38 सिलेंडर कमी वजनाचे आणि सिलिंडरमधून गॅसचोरी करण्याची सामुग्री सापडली.

प्राप्त तक्रारीनुसार या एजन्सीच्या एक गाडीतील सिलेंडरची तपासणी करण्यापूर्वी गाडीत संशयास्पद टूल्स सापडले होते. हे टूल्स भरलेल्या सिलेंडरमधून गॅसचोरीसाठी वापरले जात असल्याने सहाय्यक आयुक्तांनी एजन्सीच्या गोडाऊनची तपासणी केली.

51 डोमेस्टिक सिलेंडरची तपासणी केली असता 38 सिलेंडर कमी वजनाचे सापडले. कंपनी मॅनेजरला सदरचे सील तोडले की ओरीजनल आहे याविषयी रिपोर्ट देण्यात विषयी सांगण्यात आले आहे. यासंदर्भात अहवाल आल्यावर पॅकेज कमोडीटी ॲक्टनुसार कडक कारवाई केली जाईल असे पंचवाडकर यांनी सांगितले.

तपासणीत सापडलेले गॅसचोरीसाठी वापरण्यात येणारे सामान जप्त करण्यात आले असून ग्राहकांना असे प्रकार आढळल्यास तक्रारीसाठी 0832-2416432 या नंबरवर संपर्क साधण्याचे आवाहन करण्यात आलं आहे.