Lawrence Bishnoi Gang : जोधपूर येथील जेसाराम याच्या कार्यालयात घुसून त्याचे हातपाय बांधून व मारहाण करून लॉरेन्स बिष्णोई टोळीने लाखो रुपयांची लूट केल्याप्रकरणी ‘वाँटेड’ असलेल्या अट्टल गुन्हेगार पवन सोळंकी याला पणजी पोलिसांनी सरदार पुरा पोलिसांच्या मदतीने कॅसिनोवर जुगार खेळण्यासाठी गेला असता त्याला शिताफीने अटक केली.

सरदार पुरा पोलिसांनी त्याला ताब्यात घेऊन जोधपूरला रवाना झाले, अशी माहिती पोलिस अधीक्षक निधीन वाल्सन यांनी दिली. संशयित पवन सोळंकी हा लॉरेन्स बिष्णोई टोळीचा सदस्य आहे.

या टोळीच्या म्होरक्याच्या इशाराऱ्यानुसार जोधपूरमध्ये खंडणीवसुली तसेच लुटमार व चोऱ्यांचे प्रकार सुरू आहेत. 4 मार्च रोजी या टोळीच्या काही सदस्यांनी तोंडाला मास्क लावून जेसाराम याच्या कार्यालयात प्रवेश केला होता.

मारहाण करून त्याचे हातपाय बांधले व कार्यालयातील रोकड लुटली होती. सरदार पुरा पोलिसांनी याप्रकरणी टोळीतील काहींना अटक केली होती, मात्र पवनने पळून गोव्यात आश्रय घेतला होता. त्याचा शोध घेत सरदार पुरा पोलिसांना तो कॅसिनोवर जुगार खेळण्यास जात असल्याची माहिती पोलिसांनी मिळवली होती.