डिचोली: नामाचा जयघोष आणि हजारो भाविकांच्या उपस्‍थितीत श्री लइराई देवीने शनिवारी रात्री भक्तिमय वातावरणात मंदिरात प्रवेश केला. त्‍यानंतर शिरगावात चार दिवसांपासून सुरू असलेल्या कौलोत्सवाची उत्साहात सांगता झाली.

सायंकाळी ढगाळ वातावरण निर्माण झाल्याने कौलोत्सवावर पावसाचे सावट होते. मात्र ते ‘विघ्‍न’ दूर होऊन कौलोत्सव उत्‍साहात साजरा झाला.

कौलोत्सवाचा आज शेवटचा दिवस असल्याने संपूर्ण शिरगाव भक्तिरसात न्हाऊन गेले होते. सायंकाळपर्यंत शिरगावात भाविकांची गर्दी नियंत्रणात होती. हजारो भाविकांसह आमदार प्रेमेंद्र शेट यांनीही कौल घेतला. कौल घेण्यासाठी भाविकांनी प्रत्येक ठिकाणी रांगा लावल्या होत्या.

रात्री श्री लइराई देवीच्‍या मंदिर परिसरात भाविकांची गर्दी उसळली होती. गेल्या वर्षीप्रमाणे यंदाही भाविकांना मंदिरात प्रवेश रोखल्याने देवीच्या कळसाचे सुरळीतपणे मंदिरात आगमन झाले. जत्रेनंतर मागील चार दिवसांपासून सुरू असलेल्या कौलोत्सवाचीही परंपरेप्रमाणे सांगता झाली.

देवी मंदिरात प्रवेश करतेवेळी कोणतीही अनुचित घटना घडली नाही. गेल्या बुधवारपासून कौलोत्सवाला प्रारंभ झाला होता. शनिवारी रात्री साडेआठच्या सुमारास देवीचे मंदिरात आगमन झाले.

रात्री देवी मंदिरात प्रवेश करतेवेळी भाविकांची तोबा गर्दी झाली होती. देवीसह चौगुले आणि काही भाविकांनी मंदिरात प्रवेश केला. पोलिसांनी चोख कामगिरी करताना हजारो भाविकांवर नियंत्रण मिळविले. यावेळी पोलिसांना अक्षरशः कसरत करावी लागली.