Madkai News :

मडकई, फोंडा - पणजी महामार्गावरील कुंडई येथील एकेरी वाहतुकीच्या रस्त्याबाबत कोणताच फलक नसल्याने या रस्त्यावरून दोन्ही बाजूंनी वाहने येत असल्याने अपघातांचा धोका निर्माण झाला आहे.

फोंडा ते पणजी महामार्गावर वाहतूक प्रचंड प्रमाणात वाढली आहे. कुंडई येथील औद्योगिक वसाहतीकडे जाणाऱ्या वाहनांची संख्याही मोठी आहे. या ठिकाणी तपोभूमीचा रस्ता असल्याने वाहतूक बेट तयार झाले आहे.

त्यातच पणजीहून फोंड्याच्या दिशेने येणारी परराज्यातील पर्यटक वाहने या ठिकाणी फलक नसल्याने चुकून उतरणीवरील रस्त्याने येत असल्याने समोरून येणाऱ्या वाहनाला ठोकरण्याचे प्रकार होत आहेत.

...अन् अपघात होता होता टळला

आठवड्याभरापूर्वी एका परराज्यातील वाहनचालकाला हा रस्ता एकेरी असल्याचे माहीत नसल्याने त्याने भरधाव कार या रस्त्याने हाकल्याने एका दुचाकीला ठोकरले होते. त्यानंतर एका ट्रकचा बसशी अपघात होता होता टळला.

त्यावेळी जागरूक नागरिकांनी पोलिसांशी संपर्क साधून ट्रक पोलिसांच्या ताब्यात दिला होता. अशाप्रकारचे अनेक अपघात या ठिकाणी होत असल्याने आवश्‍यक सूचना फलक उभारण्याची मागणी होत आहे.