कुळे: कुळे पंचायत क्षेत्रात बुधवारी सकाळी एकाच कुटुंबातील दोन भावांचा हृदयविकाराच्या झटक्याने मृत्यू झाला.

शिगाव-कुळे येथे बुधवारी सकाळी धाकट्या भावाला उमाकांत वेळीप (५८) यांना अचानक हृदयविकाराचा झटका आला. कुटुंबीयांनी तात्काळ रुग्णवाहिकेला संपर्क साधला. मात्र, कुळे बाजार परिसरात घडलेल्या अपघातामुळे स्थानिक रुग्णवाहिका अन्य कामात व्यस्त होती.

तत्परतेने दुसरी रुग्णवाहिका रवाना करण्यात आली, पण ती पोहोचेपर्यंत धाकट्या भावाचा मृत्यू झाला. धाकट्याच्या मृत्यूचा जबर धक्का सहन न झाल्याने ज्येष्ठ बंधू संतोष वेळीप (६५) यांनाही हृदयविकाराचा झटका आला.

त्यांना खासगी वाहनातून रुग्णालयात नेत असताना वाटेत रुग्णवाहिका मदतीला धावून आली. मात्र, अर्ध्या वाटेतच त्यांचाहीमृत्यू झाला.