Kulem to Kale railway doubling forest clearance approval

पणजी: कुळे ते काले लोहमार्गाच्या दुपदरीकरणासाठी १५.६ हेक्टरवरील जंगल हटविण्यास परवानगी द्यावी, अशी मागणी राज्य सरकार आणि रेल विकास निगम लिमिटेडने केली आहे. पर्यावरण, वन आणि हवामान बदल मंत्रालयाच्या प्रादेशिक अधिकारसंपन्न समितीसमोर असा अर्ज करण्यात आला आहे.

गोवा सरकारने बंगळुरू येथील प्रादेशिक अधिकारसंपन्न समितीकडे अर्ज करून उत्तर गोवा वन विभागाच्या हद्दीतील कुळे-काले विभागातील १५.६ हेक्टर जमिनीवरील वनक्षेत्र हटविण्याच्या आदेशावरील स्थगिती उठविण्याची विनंती केली आहे.

...तरच रेल्वे दुपदरीकरण शक्य

आता भारतीय वन्यजीव संस्थेने तिनईघाट (कर्नाटक) ते कुळे (गोवा) या रेल्वे दुहेरीकरण प्रकल्पाच्या परिणामांवर नवीन अहवाल सादर केला आहे.

या अहवालात नदी निचऱ्याच्या सोयी, कुंपण, प्राणी ओलांडण्यासाठी पातळी क्रॉसिंग, वॉर्निंग सिस्टीम, वन्यजीव ओव्हरपास, लहान प्राण्यांसाठी मार्ग, झाडांच्या छतासारख्या पुलांची योजना आदी संरक्षणात्मक उपाय सुचवण्यात आले आहेत.

मात्र, अहवालात, ‘‘ही सर्व उपाययोजना अमलात आणणे शक्य नसेल, तर लोहमार्गाचे दुहेरीकरण करू नये.’’ असे स्पष्टपणे नमूद केले आहे.