फातोर्डा : कोकण रेल्वेच्या गोव्यातील मार्गाचे विद्युतीकरण 95 टक्के पूर्ण झाले आहे. पेडणेपासून लोलयेपर्यंत आलेल्या 103 कि.मी. अंतर कामावर अंतिम हात फिरविण्यात येत आहे. हा प्रकल्प मार्च 2022 मध्ये पूर्ण होणार असल्याने गोमंतकीयांना विजेवर चालणाऱ्या प्रदूषणविरहीत रेल्‍वेने प्रवास करण्याची संधी मिळणार आहे.

कोकण रेल्वेतर्फे (Konkan Railways) महाराष्ट्र ते कर्नाटक पर्यंत 743 कि.मी. अंतर मार्गाचे पूर्णतः विद्युतीकरण करण्यात येणार असून महाराष्‍ट्रातील (Maharashtra) रत्नागिरीपासून गोव्यातील वेर्णापर्यंतचे विद्युतीकरणाचे काम पूर्ण झाले आहे. त्‍याबाबत रेल्‍वे अधिकाऱ्यांनी सुरक्षेबाबत चाचणी केली आहे. त्‍यांनी रेल्वे विद्युतीकरणाला हिरवा कंदीलही दाखविण्यात आला आहे.

वेर्णापासून गोव्यातील दक्षिण सीमेलगत असलेल्या लोलयेपर्यंतच्या आणि कर्नाटकातील (Karnataka) कारवार रेल्वे स्टेशन मार्गावरील रुळावरील विद्युतीकरणाचे काम युद्धपातळीवर सुरू असल्याची माहिती कोकण रेल्वेचे जनसंपर्क अधिकारी बबन घाटगे यांनी दिली.

कर्नाटकमधील ठोकूर रेल्वे स्‍थानक ते कारवार पर्यंतचे आणि महाराष्ट्रातील रोहा ते रत्नागिरी रेल्वे स्‍थानकापर्यंतचे काम पूर्ण झाले आहे. या रेल्वे मार्गाला कमिशनर रेल्वे सेफ्टीतर्फे सहमती मिळाली आहे. गोव्‍यासह (Goa) महाराष्‍ट्र आणि कर्नाटक मिळून 743 कि.मी. अंतराच्‍या या प्रकल्पाच्या कामाचा अंदाजे खर्च 1100 कोटी रुपये असा आहे.