मडगाव: कोकण रेल्वेने आपल्या मार्गावरील वाहतुकीची गर्दी कमी करण्यासाठी आणि प्रवाशांचा प्रवास सुरक्षित करण्यासाठी एक मोठा प्लॅन तयार केला आहे. पुढील ५ वर्षांत तब्बल ४,७०४ कोटी रुपये खर्च करून रेल्वे मार्गाचा कायापालट केला जाणार आहे. हा प्रस्ताव मंजुरीसाठी रेल्वे बोर्डाकडे पाठवण्यात आला आहे. या प्लॅनमध्ये गोव्यातील रेल्वे सुविधांवर मोठा भर देण्यात आला आहे.

त्याच बरोबर मुंबई-मडगाव वंदे भारत एक्सप्रेसला आता ८ ऐवजी १६ डबे जोडले जातील.

कोकण रेल्वे महामंडळाचे अध्यक्ष संतोष कुमार झा यांनी प्रसार माध्यमांना ही माहिती दिली. यामध्ये वैभववाडी ते मडगाव दरम्यानच्या १५१ किमी मार्गाचे दुपदरीकरण केले जाणार आहे.

याशिवाय ट्रेन क्रॉसिंग सोपे करण्यासाठी मये आणि नेवरा येथे नवीन क्रॉसिंग स्टेशन्स बनणार असे त्यांनी सांगितले. या शिवाय ९९.४ कोटी रुपये खर्चून मदुरे, पेडणे आणि ओल्ड गोवा बोगद्याच्या शेजारी नवे समांतर बोगदे बांधले जातील. मडगाव ते लोलये दरम्यान जुने झालेले रेल्वे ट्रॅक बदलण्याचे काम केले जाईल.

सुरक्षेसाठी ‘एआय’चा वापर

पावसाळ्यात दरडी कोसळण्याचा धोका टाळण्यासाठी ‘एआय’ तंत्रज्ञानाचा वापर केला जाईल. अपघात रोखण्यासाठी संपूर्ण कोकण रेल्वे मार्गावर ‘कवच’ ही स्वयंचलित सुरक्षा यंत्रणा बसवली जाईल. या सर्व सुधारणांमुळे कोकण रेल्वेचा प्रवास अधिक वेगवान, सुरक्षित आणि आरामदायी होणार आहे, असे झा यांनी सांगितले.