Kolhapur - Goa Flight

पणजी: कोल्हापूर येथून गोव्याला थेट विमानसेवा सुरु करण्याच्या हालचालींना वेग आला आहे. नवी विमानसेवा सुरु करण्याबाबत विमानतळ व्यवस्थापन आणि संबधित कंपनीकडून प्रयत्न सुरु असल्याची माहिती आहे.

सर्व बाबी वेळेत पूर्ण झाल्यास येत्या ऑक्टोबरमध्ये कोल्हापूर ते गोवा विमानसेवा सुरु होण्याची शक्यता आहे. विमानसेवा सुरु झाल्यात 20 ते 30 मिनिटात गोवा गाठणे शक्य होणार आहे.

कोल्हापूर विमानतळावरुन सध्या मुंबई, हैद्राबाद येथे विमानसेवा सुरु आहे. नव्याने गोव्यासाठी थेट विमानसेवा सुरु झाल्यास प्रवाशांना केवळ 20 ते 30 मिनिटात गोव्याला जाता येणार आहे. गेल्या अनेक दिवसांपासून कोल्हापुरातून गोव्यासाठी विमानसेवा सुरु करण्याची मागणी केली जात आहे. या मागणीला आता लवकरच मूर्त स्वरुप येण्याची शक्यता आहे.

कोल्हापूर ते गोवा थेट विमानसेवा सुरु करण्यास विमान कंपनी देखील उत्सुक असल्याची माहिती आहे. याबाबत आवश्यक परवानगी आणि इतर प्रक्रिया सुरु आहे. वेळेत सर्व बाबी पूर्ण झाल्यास येत्या २५ ऑक्टोबरपर्यंत ही विमानसेवा सुरु होईल, अशी शक्यता आहे.

यासह कोल्हापूर ते हैद्राबाद या मार्गावर आणखी एक विमान सुरु करण्याचा प्रस्ताव आहे.

कोल्हापूर - दिल्ली आणि अहमदाबादसाठी विमानसेवा

कोल्हापूर विमानतळावरून दिल्ली आणि अहमदाबादसाठी विमानसेवा सुरु करण्याबाबत हालचाली सुरु आहेत. दिल्लीसाठी एअरबस या विमान कंपनीची ट्रयल घेण्याबाबत सध्या काम प्रगतीपथावर आहे. दिल्लीसाठी २५ ऑक्टोबरपासून विमानसेवा सुरु करणे जवळपास निश्चित आहे. तसेच, बंद झालेली कोल्हापूर - अहमदाबाद विमानसेवा देखील लवकरच सुरु होण्याची शक्यता आहे.