पणजी: कोची मेट्रोचे दुसरे पथक येत्या चार दिवसांत गोव्यात येणार आहे. गोव्यात वॉटर मेट्रो सुरू करण्यासाठी यापूर्वी कोची मेट्रोचे पथक येऊन मार्गांचे सर्वेक्षण करून गेले आहे. परंतु दुसरे येणारे पथक हे मार्गावर स्टेशन, थांबे कोठे उभारायचे याविषयीची पाहणी करणार असल्याची माहिती नदी परिवहनच्या वरिष्ठ अधिकाऱ्यांनी दिली आहे.

गेल्या महिन्यात सप्टेंबरमध्ये कोची मेट्रोच्या एका पथकाने आठवडाभर जलमार्गांचा अभ्यास केला होता. त्यातून शापोरा वगळता मांडवी, तेरेखोल नदीवर वॉटर मेट्रो सुरू होऊ शकते, अशी शक्यता वर्तविली आहे. या पथकानंतर कोची मेट्रो व्यवस्थापनाने दुसरे पथक पाठविले जाईल, असे सांगितले होते, त्यानुसार आता या आठवड्यात दुसरे पथक दाखल होईल.

अगोदरच्या पथकाने केलेल्या निरीक्षणाच्या अंदाजानुसार जलमार्गावर थांबे (जेटी), स्टेशन उभारण्याविषयी ठिकाणे सूचित केली होती. त्यानुसार नव्याने येणारे पथक त्या जागांची पाहणी करून आपला अहवाल सादर करणार आहे.

केरळमध्ये कोची शहरात कोची मेट्रोने वॉटर मेट्रो सुरू केली आहे. त्याच धर्तीवर हे सेवा गोव्यातही सुरू करण्याचा केंद्र सरकारच्या विचाराधीन असल्याने हा प्रकल्प राज्य सरकारच्या माध्यमातून पुढे नेला जाणार आहे.