पणजी: अंमलीपदार्थविरोधी कक्षाच्या पोलिस पथकाने राज्यातील ड्रग्ज माफियांचा पर्दाफाश करत केरळच्या २९ वर्षीय तरुण आल्विन थोमाचनला २२ लाखांच्या ड्रग्जसह शिवोली येथून अटक केली. न्यायालयाने त्याला ५ दिवसांची पोलिस कोठडी दिली आहे. पोलिस अधीक्षक सुनिता सावंत यांच्या मार्गदर्शनाखाली ही कारवाई करण्यात आली.

अंमलीपदार्थ कक्षाच्या पोलिसांना शिवोली भागात रात्रीच्यावेळी ड्रग्जची विक्री होत असल्याची माहिती मिळाली होती. त्यानुसार गेल्या काही दिवसांपासून शिवोली या भागात पोलिसांनी पाळत ठेवली होती.

संशयिताची माहिती मिळाल्यावर त्याच्यावर अत्याधुनिक यंत्रणेच्या साहाय्याने त्याच्या हालचालींवर नजर होती. काल रात्री तो हायड्रोपोनिक तण व एलएसडी ब्लॉट पेपर्स घेऊन संशयास्पद फिरत असताना त्याला ताब्यात घेण्यात आले.

त्याची झडती घेतली असता त्याच्याकडे असलेला पदार्थ ड्रग्ज असल्याचे किट चाचणीद्वारे सिद्ध झाले. त्याच्याकडून जप्त केलेल्या ड्रग्जची किंमत आंतरराष्ट्रीय बाजारपेठेत सुमारे २२ लाख रुपये आहे. त्याने हा ड्रग्ज कोठून आणला होता त्याचा शोध पोलिस घेत आहेत.

बोगमाळो ड्रग्जप्रकरणी पाचजणांना अटक

चिकोळणा - बोगमाळो येथे काही दिवसांपूर्वी क्राईम ब्रँचने छापा टाकून जप्त केलेल्या ४३.२० कोटींच्या कोकेनप्रकरणी पाचजणांना अटक केली आहे. राज्यात ड्रग्ज माफिया व विक्रेते किनारपट्टी भागात सक्रिय आहेत. त्यामुळे सरकारने ड्रग्जविरोधात कठोर कारवाईचे निर्देश दिल्यामुळे जिल्हा पोलिस, क्राईम ब्रँच तसेच अंमलीपदार्थविरोधी कक्षाने धडक कारवाई सुरू केली आहे. विदेशी नागरिकांबरोबर स्थानिक युवकही या व्यवसायात गुंतले असल्याने त्यांच्या हालचालींवर नजर ठेवली जात आहे.