kerala College Goa trip: कोट्टियाममधील एका महाविद्यालयाचे प्राचार्य अडचणीत सापडले आहेत. महाविद्यालयाची गोव्याला ट्रीप आयोजित करण्यात आली होती. ट्रीप करुन कोट्टियाम येथे परतत असताना ट्रीपची गाडी पोलिसांकडून तपासण्यात आली.

यावेळी पोलिसांना विद्यार्थी, बस चालक याच्यासह प्राचार्य यांच्या देखील बॅगमध्ये मद्याच्या बाटल्या सापडल्या आहेत. शुक्रवारी (दि.22) सकाळी अबकारी खात्याने ही कारवाई केली.

कोची येथील एका स्थानिक वृत्तपत्राने दिलेल्या वृत्तानुसार, कोट्टियाममधील एका महाविद्यालयाचे काही विद्यार्थी अलिकडे गोव्यात ट्रीपसाठी आले होते. गोव्यात मौजमजा केल्यानंतर विद्यार्थी आणि शिक्षकांची व्हॅन माघारी परतत होती. दरम्यान, कोची येथे अबकारी खात्याने त्यांची गाडी तपासणीसाठी थांबवली.

तपासणीत अबकारी खात्याला गाडीत पन्नास दारूच्या बाटल्या आढळून आल्या.

पथकाने केलेल्या तपासणीत विद्यार्थी, बस चालक एवढेच नव्हे तर शाळेच्या प्राचार्यांच्या बॅगेत देखील दारुच्या बाटल्या आढळून आल्या. यावेळी ३१.०८ लिटर दरु जप्त करण्यात आली. अबकारी खात्याने महाविद्यालयाचे प्राचार्य आणि चार जणांविरोधात मद्य तस्करी केल्याप्रकरणी गुन्हा दाखल केला आहे.

गाडीत ३३ मुली, सहा मुले, बस चालक, क्लिनर, प्राचार्य आणि इतर काहीजण होते. पोलिसांपासून बचावासाठी त्यांनी लगेच कप्प्यात मद्याच्या बाटल्या ठेवल्या होत्या.

एर्नाकुलम अबकारी विशेष पथक सीआयएम सजीवकुमार यांना शुक्रवारी सकाळी अबकारी तिरुवनंतपुरम मुख्यालयाच्या नियंत्रण कक्षात याबाबत गुप्त माहिती मिळाली. त्यानंतर ही कारवाई करण्यात आली.