मडगाव: अमलीपदार्थ प्रकरणी अटकेत असलेले केनियन नागरिक सॅम्युएल ओचिएंग कॅलारा व नायजेरियन नागरिक जेम्स एबुबे चुक्वू या दोघांचे जामीन अर्ज दक्षिण गोवा अतिरिक्त सत्र न्यायालयाचे न्यायाधीश राम प्रभुदेसाई यांच्या न्यायालयाने फेटाळून लावले.

तपासात संशयितांवरील आरोपात प्रथमदर्शनी तथ्य आहे हे सिद्ध झाले आहे. त्यांना जामीन मिळाल्यास त्यांच्याकडून पुन्हा असाच गुन्हाही होऊ शकतो, असे निरीक्षण नोंदविताना जामीन अर्ज नामंजूर केला जात असल्याचा निवाडा न्यायालयाने दिला.

अमलीपदार्थ नियंत्रण खात्याच्या गोवा विभागाकडून २०२३ साली संशयितांवर कारवाई करून त्यांना अटक केली होती. सॅम्युएल कॅलारा हा दक्षिण आफ्रिकेतून दुबई मार्गे गोव्यातील दाबोळी विमानतळावर आलेला होता.

यावेळी त्याच्या बॅगेत अमलीपदार्थ आढळलेले होते. त्याशिवाय संशयित चुक्वू हा समाजमाध्यमांचा वापर करून अमली पदार्थांची विक्री करत असल्याचे आढळून आले होते.