म्हापसा : कासारवाडा–खोर्ली, म्हापसा येथे गटार पुनर्बांधणीसाठी सुरू असलेल्या खोदकामादरम्यान सकाळी दुर्दैवी दुर्घटना घडली. खोदकाम चालू असताना एका घराची दगडी संरक्षक भिंत अचानक कोसळून खाली काम करणाऱ्या दोन मजुरांवर पडली. या अपघातात एका मजुराचा जागीच मृत्यू झाला, तर दुसरा मजूर गंभीर जखमी झाला आहे.

ही घटना म्हापसा पालिकेच्या प्रभाग क्रमांक १८ मध्ये घडली. या दुर्घटनेत तोजाम्मेल हक ऊर्फ राजू (वय ३८, मूळ रहिवासी पश्चिम बंगाल) याचा मृत्यू झाला. तर विशाल सरू (वय २१, मूळ रहिवासी पश्चिम बंगाल) हा गंभीर जखमी असून त्याच्यावर सध्या म्हापसा जिल्हा इस्पितळात उपचार सुरू आहेत.

मृत व जखमी दोन्ही मजूर कासारवाडा, म्हापसा परिसरात भाड्याच्या खोलीत वास्तव्यास होते. मिळालेल्या माहितीनुसार, कासारवाडा–खोर्ली परिसरात चतुरी गुप्ता यांच्या घराशेजारी गटार पुनर्बांधणीसाठी खोदकाम सुरू होते.

यावेळी घराची जुनी दगडी संरक्षक भिंत अचानक कोसळली आणि दोन्ही मजूर तिच्या ढिगाऱ्याखाली अडकले. सहकाऱ्यांनी तत्काळ मदतकार्य सुरू करून जखमींना बाहेर काढले आणि रुग्णालयात दाखल केले. घटनेची माहिती मिळताच म्हापसा पोलिसांनी घटनास्थळी धाव घेत पंचनामा केला.

या प्रकरणाचा पुढील तपास पोलिस उपनिरीक्षक बाबलो परब करीत आहेत. कामाच्या ठिकाणी सुरक्षेच्या उपाययोजनांबाबत प्रश्न उपस्थित होत असून, पालिकेच्या बांधकामांमध्ये आवश्यक खबरदारी घेण्याची मागणी नागरिकांकडून होत आहे.