Anjuna Beach: गोव्यातील समुद्रकिनाऱ्यांवर फिरताना पर्यटक अनेकदा उत्साहाच्या भरात तरा काहीवेळा जाणते-अजाणतेपणे चुकीचे काही करून बसतात. हणजुणे बीचवर असाच एक प्रकार समोर आला आहे. येथे शुक्रवारी समुद्रकिनाऱ्यावरील दोन खडकांच्या फटीत एका तरूणाचा पाय अडकला.

अनेक प्रयत्न करूनही तरूणाला पाय बाहेर काढता आला नाही. अखेर त्यासाठी फायरब्रिगेडला बोलवावे लागले. दरम्यान, फायरब्रिगेडच्या जवांनांनी दगड फोडून या तरूणाची सुटका केली.

अल्विन डिसुझा (वय 33 वर्षे) असे या युवकाचे नाव आहे. तो मूळचा कुंदापुरा (उडुपी, कर्नाटक) येथील आहे.

समुद्रात जलक्रीडा केल्यानंतर अल्विन या दगडावर आला होता. तेथे चुकून त्याचा पाय दोन दगडांच्या फटीत अडकला. त्याने तसेच त्याच्या सहकाऱ्यांनी खूप प्रयत्न करूनही पाय बाहेर निघाला नाही. त्यामुळे काही तास अल्विनला तिथेच अडकून पडावे लागले.

अखेर अग्निशमन दलाला ही घटना कळविण्यात आली. त्यावेळी अग्निशमन दलाचे जवान शाहिद खान, प्रेमानंद कांबळी, दत्तराज च्यारी, सानिल बाणावलीकर, चंद्रकांत नाईक, दिप्तेश गावडे यांनी दगड फोडून पायासाठी वाट करून अल्विन याचा पाय सुखरूपपणे बाहेर काढला.