Bengaluru Goa Private Bus Accident At Goa: कर्नाटकच्या एका खासगी बसला आज, गुरूवारी 7 सप्टेंबर रोजी सकाळी गोव्यातील झुआरी पुलावर अपघात झाला.

बसचालकाला डुलकी लागल्याने ही बस उलटल्याचे सांगितले जात आहे. या अपघातात बसमधील दहा प्रवासी जखमी झाले आहेत.

जखमींना उपचारासाठी बांबोळी येथील गोमॅकॉ रूग्णालयात दाखल करण्यात आले आहे. ही बस (केए 01 एजे 2462) कर्नाटकची असून ती बंगळूर हून गोव्याला येत होती. आगशी येथे हा अपघात झाला. चालकाला डुलकी लागल्याने अपघात झाल्याचा दावा काही प्रवाशांनी केला आहे.

अचानक बस उलटल्याने प्रवाशांमध्ये घबराट पसरली होती. एकमेकांच्या मदतीने आणि येणाऱ्या जाणाऱ्या वाहनधारकांनी बसमधून बाहेर पडायला प्रवाशांना मदत केली. अपघात झाला तेव्हा या रस्त्यावर फारशी रहदारी नव्हती.